¹ Сия словеса книги, юже написа Варух сын Нириин, сына Маасеева, сына Седекиина, сына Асадеева, сына Хелкиина в Вавилоне,

² в пятое лето, в седмый день месяца, во время, в неже взяша Халдее Иерусалим и пожгоша его огнем.

³ И прочте Варух словеса книги сея во ушы Иехонии сына Иоакима царя Иудина и во ушы всех людий приходящих ко книзе,

⁴ и во ушы сильных и сынов царских и во ушы старейшин, и во ушы всех людий от мала и до велика их, всех живущих в Вавилоне при реце Суд.

⁵ И плакахуся, и постяхуся, и моляхуся молитвами пред Господем,

⁶ и собраша сребро, якоже когождо можаше рука,

⁷ и послаша во Иерусалим ко Иоакиму жерцу великому, сыну Хелкиину сына Саломля и ко жерцем и ко всем людем, иже обретошася с ним во Иерусалиме,

⁸ внегда взя сосуды храма Господня изнесеныя от храма возвратити на землю Иудину, в десятый день месяца Сиван, сосуды сребряны, яже сотвори Седекиа сын Иосиин царь Иудин,

⁹ повнегда пресели Навуходоносор царь Вавилонский Иехонию и князи, и узники и сильныя и люди земли от Иерусалима, и введе я (связаны) в Вавилон.

¹⁰ И рекоша: се, послахом к вам сребро, да купите на сребре всесожжения за грех и фимиам, и сотворите жертву и вознесите на жертвенник Господа Бога нашего,

¹¹ и молитеся за житие Навуходоносора царя Вавилонскаго и за житие Валтасара сына его, да будут дние их, якоже дние небеснии, на земли.

¹² И да даст Господь крепость нам и да просветит очи наши, и да живем под сению Навуходоносора царя Вавилонска и под сению Валтасара сына его, да работаем им дни многи и обрящем благодать пред ними.

¹³ И молитеся за нас ко Господеви Богу нашему, яко согрешихом Господеви Богу нашему, и не отвратися ярость Господня и гнев Его от нас до сего дне.

¹⁴ И прочтите книгу сию, юже послахом к вам, исповедати в дому Господни в день праздника, во дни годовыя,

¹⁵ и да речете: Господу Богу нашему правда, а нам стыдение лиц, якоже день сей, человеку Иудину и живущым во Иерусалиме,

¹⁶ и царем нашым и князем нашым, и жерцем нашым и пророком нашым и отцем нашым:

¹⁷ понеже согрешихом пред Господем

¹⁸ и не покорихомся Ему и не послушахом гласа Господа Бога нашего ходити в повелениих Его, яже даде пред лицем нашим.

¹⁹ От дне, в оньже изведе Господь отцы нашя от земли Египетски, и до сего дне бехом не покаряющеся Господеви Богу нашему и отметахомся, еже не послушати гласа Его.

²⁰ И прильпе к нам зло и клятва, юже сочини Господь Моисею отроку Своему в день, в оньже изведе Господь отцы нашя от земли Египетския, дати нам землю кипящую млеком и медом, якоже день сей.

²¹ И не послушахом гласа Господа Бога нашего по всем словесем пророческим, яже посла к нам,

²² и хождахом кийждо нас по разуму сердца своего злаго работати богом инем, творити злая пред очима Господа Бога нашего.