¹ И рече Господь к Моисею и Аарону, глаголя:

² рцыте сыном Израилевым, глаголюще: сии скоти, ихже имате ясти от всех скотов, иже на земли:

³ всяк скот раздвояющь копыто и пазнокти имеющь на двое, и отрыгаяй жвание в скотех, сия да ясте:

⁴ токмо от сих да не снесте от отрыгающих жвание и от раздвояющих копыта и делящих пазнокти: велблюда, яко сей износит жвание, но пазноктей не делит на двое, нечист сей вам:

⁵ и хирогриля, яко износит жвание, а пазноктей не делит, нечист сей вам:

⁶ и заяца, иже отрыгает жвание, но пазноктей не делит на двое, нечист сей вам:

⁷ и свинии, яко делит пазнокти на двое и копыто раздвояет, но не отрыгает жвания, нечиста сия вам:

⁸ от мяс их да не ясте и мертвечине их да не прикасаетеся, нечиста сия вам.

⁹ И сия да ясте от всех, яже в водах: вся, имже суть перия и чешуя в водах, и в морях и в езерах, сия да ясте:

¹⁰ и всем, Имже несть перие ни чешуи в водах, и в морях и в езерах, от всех, яже износят воды, и всяка душа живущая в воде, скверна есть, и скверна да будут вам:

¹¹ от мяс их да не ядите и мертвечины их гнушайтеся:

¹² и вся, имже несть перия и чешуи, иже в водах, скверна сия суть вам.

¹³ И сих гнушайтеся от птиц, и да не ясте их, гнусни суть: орла и грифа и морскаго орла,

¹⁴ и неясыти и иктина и подобных сим:

¹⁵ и струфа и совы, и сухолапля и подобных им:

¹⁶ и всякаго врана и подобных ему: и ястреба и подобных ему:

¹⁷ и врана нощнаго и лилика и ивина,

¹⁸ и порфириона и пелекана и лебедя,

¹⁹ и еродиа и харадриона и подобных ему: и вдода и нощнаго нетопыря.

²⁰ И вся гады птичия, иже ходят на четырех, мерзость есть вам:

²¹ но сия да ясте от всех гад птичных, иже ходят четвероножны, иже имут голени выше плесну своею, скакати ими по земли:

²² и сия да ясте от сих: вруха и подобная ему, и аттака и подобная ему, офиомаха и еже подобно к нему, и акриду и подобная ей:

²³ и всяк гад от птиц, имже суть четыри ноги, мерзость есть вам, и в сих да не осквернитеся:

²⁴ всяк прикасаяйся мертвечине их нечист будет до вечера:

²⁵ и всяк вземляй мертвечину их да измыет ризы своя и нечист будет до вечера.

²⁶ Во всех скотех, иже раздвояет копыто и пазнокти имеет, а жвания не отрыгает, нечиста да будут вам: всяк прикасаяйся мертвечине их нечист будет даже до вечера:

²⁷ и всяк иже ходит на лапах, во всех зверех, иже ходят на четырех, нечиста будут вам: всяк прикасаяйся мертвечине их нечист будет до вечера:

²⁸ и вземляй мертвечину их да исперет ризы своя и нечист будет до вечера: нечиста сия будут вам.

²⁹ И сия вам нечиста от гад плежущих по земли: ласица и мыш и крокодил земный,

³⁰ мигали и хамелеон, и халавотис и ящер и кроторыя:

³¹ сии нечисти вам от всех гад плежущих по земли: всяк прикасаяйся мертвечине их нечист будет до вечера.

³² И всяко, в неже аше впадет от них нечто от мертвечины их, нечист будет всяк сосуд древян, или риза, или кожа, или вретище: всякий сосуд, в немже творится дело, в воде погрузится и нечист будет до вечера, и по сих чист будет:

³³ и всяк сосуд глинян, в оньже аще впадет от сих внутрь, елика суть в нем, нечиста будут, и сосуд да разбиется.

³⁴ И всяка снедь юже ясте, на нюже аще возлиется вода, нечиста будет вам: и всякое питие, еже пиете во всяком сосуде, нечисто будет (вам):

³⁵ и все, еже аще впадет в не от мертвечины их, нечисто будет: пещи и огнища да сокрушатся, нечиста сия суть и нечиста будут вам.

³⁶ Кроме источник водных и поток, и собраний водных, будут чисти: а иже прикасается мертвечинам их, нечист будет.

³⁷ Аще же впадет от мертвечины их на всяко семя семянное, еже сеется, чисто будет:

³⁸ аще же возлиется вода на всяко семя, и впадет от мертвечины их на не, нечисто будет вам.

³⁹ Аще же умрет от скота, егоже вам ясти, прикасаяйся мертвечине его, нечист будет до вечера:

⁴⁰ и ядый от мертвечин сих да исперет ризы своя и нечист будет до вечера: и вземляй мертвечину их да измыет ризы своя и измыется водою, и нечист будет до вечера.

⁴¹ И всяк гад плежущий по земли мерзость вам есть сие, да не снестся.

⁴² И всяко ходящее на чреве, и всяко ходящее на четырех всегда, и (всяко) многоножное во всех гадех, иже плежут по земли, да не снесте е, яко мерзость вам есть:

⁴³ и да не омерзите душ ваших во всех гадех плежущих по земли, и да не осквернитеся ими, и да не будете нечисти в них,

⁴⁴ яко Аз есмь Господь Бог ваш: и да освятитеся и будете святи, яко свят есмь Аз Господь Бог ваш: и да не оскверните душ ваших во всех гадех движущихся по земли,

⁴⁵ яко Аз есмь Господь, изведый вас из земли Египетския, да буду вам Бог, и будете святи, яко свят есмь Аз Господь.

⁴⁶ Сей закон о скотех и о птицах, и всякой души движущейся в водах и всякой души пресмыкающейся по земли,

⁴⁷ разлучити между нечистыми и между чистыми, и научити сыны Израилевы между оживляющими ядомая и между оживляющими не ядомая.