¹ И рече Господь к Моисею, глаголя:

² глаголи сыном Израилевым и речеши к ним: муж или жена, иже аше обещается зело обетом, еже очиститися чистотою Господу,

³ да воздержится от вина и сикера, и оцта винна и оцта от сикера да не пиет: и, елика делаются от грозд винных, да не пиет, и гроздия свежаго и сухаго да не снест.

⁴ Во вся дни обета своего от всех, елика бывают от винничины вина, от кости и до скорлупы да не пиете, ниже ясте от всего.

⁵ Во вся дни обета очищения своего бритва да не взыдет на главу его, дондеже скончаются дние, елики обещал есть Господу: свят будет растяй власы главы своея.

⁶ Во вся дни обета своего Господу, ко всякой душе скончавшейся да не внидет.

⁷ Над отцем и над материю, и над братом и над сестрою, да не осквернится над ними, умершым им, яко обет Бога его на главе его.

⁸ Вся дни обета его свят будет Господу.

⁹ Аше же кто смертию внезапу умрет у него, абие осквернится глава обета его, и обриет главу свою, в оньже день очистится, в день седмый да обриется,

¹⁰ и в день осмый да принесет два горличища или два птенца голубина к жерцу пред двери скинии свидения:

¹¹ и да сотворит жрец едину греха ради, и другую во всесожжение, и да помолится о нем жрец, о нихже согреши, о души, и освятит главу свою в той день, в оньже освятися Господу, во дни обета своего.

¹² И да приведет агнца единолетна в преступление, и дние прежнии да не будут ему в число, понеже осквернися глава обета его.

¹³ И сей закон обещавшагося, в оньже день скончает дни обета своего, да принесет сам к дверем скинии свидения:

¹⁴ и да приведет дар свой Господу агнца единолетна непорочна единаго во всесожжение, и агницу единолетну едину непорочну греха ради, и овна единаго непорочна во спасение,

¹⁵ и кош опресноков от муки пшеничны, хлебы смешаны с елеем, и опресноки помазаны елеем, и жертву их и возлияние их.

¹⁶ И да принесет жрец пред Господа, и да сотворит еже греха ради его, и всесожжение его,

¹⁷ и овна сотворит жертву спасения Господу на кошнице опресноков, и да сотворит жрец жертву его и возлияние его.

¹⁸ И да обриет обещавый пред дверми скинии свидения главу обета своего, и да возложит власы на огнь, иже есть под жертвою спасения:

¹⁹ и да возмет жрец рамо варено от овна, и хлеб един опресночный от кошницы, и опреснок един, и да возложит на руки обещавшемуся, по обритии главы его,

²⁰ и да принесет я жрец возложение пред Господа: свято да будет жерцу на грудех возложения и на раме участия: и по сих обещавыйся да пиет вино.

²¹ Сей закон обещавшагося, иже аще обещает дар Господу о обете, кроме сих яже обрящет рука его: по силе обета его, егоже аще обещает, по закону очищения.

²² И рече Господь к Моисею, глаголя.

²³ Рцы Аарону и сыном его, глаголя: сице благословите сыны Израилевы, глаголюще им:

²⁴ да благословит тя Господь и сохранит тя:

²⁵ да просветит Господь лице Свое на тя и помилует тя:

²⁶ да воздвигнет Господь лице Свое на тя и даст ти мир:

²⁷ и да возложат имя Мое на сыны Израилевы, и Аз Господь благословлю я.