¹ Книга словес Товита, сына Товиилева, сына Ананиилева, сына Адуилева, сына Гаваилева, от семене Асиилева, от племене Неффалимля,

² иже пленен бе во дни Енемессара Сара царя Ассирийска от Фисвы, яже есть одесную Кидиа Неффалимля в Галилеи выше Асира. Аз Товит путем истины ходих и правды вся дни живота моего

³ и милостыни многи творих братии моей и языку моему, шедшым со мною во страну Ассирийскую в Ниневию:

⁴ и егда бех во стране моей в земли Израилеве, юнеишу ми сущу, все племя Неффалима отца моего отступи от дому Иерусалимля, избраннаго от колен Израилевых, еже жрети всем коленом: и освящен бысть храм обитания Вышнему и создан бысть во вся роды века:

⁵ и вся колена купно отступившая жряху Ваалове юнице, и дом Неффалима отца моего:

⁶ аз же един хождах многажды во Иерусалим в праздники, якоже писано есть всему Израилю в повелении вечне, начатки и десятины плодов и первострижения имеяй,

⁷ и даях я иереем сыном Аароним ко олтарю: от всех плодов десятину даях сыном Левииным служащым во Иерусалиме, и вторую десятину продаях, и хождах и иждивах я во Иерусалиме на коеждо лето,

⁸ третию же даях, имже подобаше, якоже заповеда Деввора мати отца моего,зане сир остах от отца моего.

⁹ И егда бых муж, поях Анну жену от семене отечества нашего, и родих от нея Товию.

¹⁰ И егда пленени быхом в Ниневию, вся кратия моя и иже от рода моего ядоша от хлебов языческих:

¹¹ аз же соблюдох душу мою еже не ясти,

¹² яко памятствовах Бога всею душею моею.

¹³ И даде Вышний благодать и доброту пред Енемессаром, и бых его купец:

¹⁴ и идох в Мидию и вдах Гаваилу брату Гавриеву в Рагах Мидийских сребра десять талант.

¹⁵ И егда умре Енемессар, воцарися Сеннахирим сын его вместо его, и путие его непостоянни быша, и ктому не возмогох ити в Мидию.

¹⁶ И во днех Енемессара милостыни многи творих братии моей:

¹⁷ хлебы моя даях алчущым и одеяние нагим, и аще коего от рода моего видех умерша и извержена вне стены Ниевии, погрбах его:

¹⁸ и аще коего убиваше Сеннахирим царь, егда прииде бежай от Иудеи, погребах их отай: многих бо уби в ярости своей: и искома бываху от царя телеса, и не обретахуся.

¹⁹ Шед же един от сущих в Ниневии, сказа царю о мне, яко погребаю их. И скрыхся. Уедав же, яко ищут мя убити, убоявся отидох:

²⁰ и разграблена быша вся имения моя, и не остася ми ничтоже, кроме Анны жены моея и Товии сына моего.

²¹ И не преидоша дние пятьдесят, донележе убиста его два сына его и бежаста в горы Араратския: и воцарися Сахердан сын его вместо его, и постави Ахиахара Анаила, сына брата моего, над всем сочислением царствия своего и над всем устроением.

²² И проси Ахиахар о мне, и приидох в Ниневию. Ахиахар же бе вииочерпчий и над перстнем, и управитель и сочислитель, и постави его Сахердан вторым: бе же сын брата моего.