¹ Сынове есте Господа Бога вашего: да не нарезуетеся и не возложите плеши между очима вашима над мертвым:

² яко людие святи есте Господеви Богу вашему, и вас избра Господь Бог ваш быти вам людем избранным Ему от всех языков иже на лицы земли.

³ Да не снесте всякия мерзости.

⁴ Сия скоты ядите: телца от говяд и агнца от овец и козла от коз:

⁵ еленя и серну, и буйвола и ланя, и зубря и онагра и сайгака.

⁶ Всяк скот на двое деля пазнокти, и копыто на двое копыта, и отрыгая жвание в скотех, да ясте.

⁷ И сих да не снесте от отрыгающих жвание и от делящих пазнокти на двое, но копыт не раздвояющих: велблюда и заяца и хирогрилля: яко отрыгают жвание сии, но копыт не раздвояют, нечиста сия вам суть.

⁸ И свинии, яко на двое делит пазнокти и копыта раздвояет, и сия жвания не отрыгает, нечиста сия вам есть: от мяс их да не ясте, и мертвечинам их да не прикоснетеся.

⁹ И сия да ясте от всех яже в воде: вся, имже суть перие и чешуя, ядите.

¹⁰ И всех, имже несть перия, на чешуи, да не ясте: нечиста суть вам.

¹¹ Всяку птицу чисту да ясте.

¹² И сих да не ясте от них:

¹³ орла и грифа и орла морскаго,

¹⁴ и неясыти и иктина и подобных сим:

¹⁵ и врана и врабия, и выпелицы и сухолапля, и ястреба и подобных сим:

¹⁶ и врана нощнаго и лилика и подобных сим:

¹⁷ и еродиа и лебедя, и ивина и катаракта, и вдода

¹⁸ и нощнаго нетопыря, и сыча и теслоноса, и харадриона и подобных сим, и порфириона.

¹⁹ Вся гады птичия нечиста суть вам: да не ясте от них.

²⁰ Всяку птицу чисту да ясте.

²¹ Всякия мертвечины да не ясте: приселнику, иже во градех твоих, да дасте, и да яст, или да продасте страннику: яко людие святи есте Господеви Богу вашему. Да не свариши ягняте во млеце матере его.

²² Десятины да даси от всего плода семене своего, плод нив твоих от года до года,

²³ и да снеси я пред Господем Богом твоим на месте, идеже изберет Господь Бог твой призывати имя Его тамо: да принесеши десятину пшеницы твоея и вина твоего и елеа твоего, и первенцы волов твоих и овец твоих, да научишися боятися Господа Бога твоего вся дни.

²⁴ Аще же далече будет путь от тебе и не возможеши донести их, яко далече место от тебе, еже изберет Господь Бог твой призывати имя Его тамо, яко да благословит тя Господь Бог твой:

²⁵ и продаси сие на цене, и возмеши сребро в руку твою, и пойдеши на место, иже изберет Господь Бог твой,

²⁶ и даси сребро за все, на неже пожелает душа твоя, на волы и овцы, или на вино, или на сикеру, или на все, егоже желает душа твоя, и да снеси тамо пред Господем Богом твоим, и возвеселишися ты и дом твой.

²⁷ И левит иже во градех твоих, не оставивши его, яко несть ему части ни жребия с тобою:

²⁸ по трех летех да изнесеши всю десятину жит твоих в лето оно, да положиши ю во градех твоих:

²⁹ и приидет левит, яко несть ему части ни жребия с тобою, и пришлец, и сирота и вдова, яже во градех твоих, да ядят и насытятся: да благословит тя Господь Бог твой во всех делех твоих, яже аще сотвориши.