¹ Егда же погубит Господь Бог твой языки, ихже Господь Бог твой дает тебе землю, и наследиши их и вселишися во градех их и в домех их,

² три грады да отлучиши себе среди земли твоея, юже Господь Бог твой дает тебе в наследие.

³ Уготови себе путь, и на трое раздели пределы земли твоея, юже разделяет тебе Господь Бог твой: и да будет убежище тамо всякому убийце.

⁴ Сие же да будет заповедание убийце, иже аще убежит тамо, и жив будет: иже аще убиет ближняго своего не ведя, и сей не ненавиде его прежде вчерашняго дне и третияго,

⁵ и иже аще пойдет с подругом своим в лес собирати дрова, и поползнется рука его с секирою секущаго дрова, и спадши секира с топорища улучит подруга его, и умрет, сей да убежит во един от градов сих, и жив да будет:

⁶ да не погнав ужик крове вслед убившаго, яко разгорится сердце ему, и постигнет его, аще должайший будет путь, и убиет душу его, и умрет: и сему несть суд смертный, понеже не бе ненавидя его прежде вчерашняго и третияо дне:

⁷ сего ради заповедаю аз тебе слово сие, глаголя: три грады да отлучиши себе.

⁸ Аще же разширит Господь Бог твой пределы твоя, якоже клятся отцем твоим, и даст тебе Господь всю землю, юже рече дати отцем твоим,

⁹ аще послушаеши творити вся заповеди сия, яже аз заповедаю тебе днесь, любити Господа Бога твоего, ходити во всех путех Его вся дни: и да приложиши себе еще три грады к сим трием градом,

¹⁰ и да не пролиется кровь безвинна в земли твоей, юже Господь Бог твой дает тебе в жребий, и да не будет в тебе крови повинен.

¹¹ Аще же будет у тебе человек ненавидяй ближняго своего, и навет сотворит нань, и востанет нань, и поразит душу его, и умрет, и вбегнет во един от градов сих,

¹² да послют старейшины града того, и возмут его оттуду, и да предадят его в руце ужиков крове, и да умрет:

¹³ да не пощадит его око твое, и да очистиши кровь неповинную от Израиля, и благо будет тебе.

¹⁴ Да не предвижеши пределов ближняго своего, яже поставиша отцы твои в наследии твоем, еже наследовал еси в земли, юже Господь Бог твой дает тебе во жребий.

¹⁵ Да не пребудет свидетель един во свидетелство на человека по всякой обиде и по всякому преступлению и по всякому греху, имже аще согрешит: при устех двою свидетелей и при устех триех свидетелей да станет всяк глагол.

¹⁶ Аще же востанет свидетель неправеден на человека, глаголя на него нечестие,

¹⁷ да станут оба человека, имже есть пря, пред Господем и пред жерцы и пред судиями, иже будут в тыя дни,

¹⁸ и да испытают их судии прилежно, и се, свидетель неправеден свидетелствова неправду, воста на брата своего:

¹⁹ да сотворите ему, якоже и он умысли сотворити супротив брата своего, и измите злое от вас самех:

²⁰ да и прочии услышавше убоятся, и не приложат ктому творити словесе злаго сего в вас:

²¹ да не пощадит его око твое: душу за душу, око за око, зуб за зуб, руку за руку, ногу за ногу, якоже аще кто даст порок на ближняго своего, сице воздастся ему.