¹ Все злато, еже соделано бысть в деле по всякому деланию святых, бяше злата начатков двадесять девять талантов и седмь сот тридесять сиклев, по сиклю святому:

² и сребра участие от исчисленных мужей сонма, сто талантов и тысяща седмь сот седмьдесят пять сиклев:

³ драхма едина с главы пол сикля, по сиклю святому: всяк приходяй к пресмотрению от двадесяти лет и вышше, на шестьдесят тем и на три тысящы пять сот и пятьдесят.

⁴ И быша сто талант сребра на слияние ста главиц скинии и на главицы завесныя, сто главиц на сто талант, талант на главицу:

⁵ и тысящу седмь сот седмьдесят пять сиклев сотвори на петли столпам, и позлати главицы их, и украси я.

⁶ И медь участия, седмьдесят талант и две тысящы и четыреста сиклев.

⁷ И сотвориша из нея стояла дверная скинии свидения,

⁸ и стояла двора окрест, и стояла дверий двора, и колки скинии, и колки двора окрест,

⁹ и обложение медяно окрест олтаря, и вся сосуды олтаря, и вся орудия скинии свидения.

¹⁰ И сотвориша сынове Израилевы, якоже заповеда Господь Моисею, тако сотвориша.

¹¹ От избывшаго же злата участия сотвориша сосуды, еже служити в них пред Господем:

¹² и от оставшия синеты и багряницы, и червленицы и виссона, сотвориша ризы служебныя Аарону, еже служити в них во святилищи.

¹³ И принесоша ризы к Моисею, и скинию и сосуды ея, и вереи ея и столпы и стояла ея,

¹⁴ и кивот завета и носила его,

¹⁵ и олтарь и вся сосуды его, и елей помазания и фимиам сложения,

¹⁶ и светилник чистый и светила его, светила вжигания и елей светения:

¹⁷ и трапезу предложения и вся сосуды ея, и хлебы предложенныя:

¹⁸ и ризы святыя, яже суть Аарони, и ризы сынов его на жречество:

¹⁹ и опоны двора, и столпы, и стояла его, и завесу дверий скинии и дверий двора: и вся сосуды скинии и вся орудия ея:

²⁰ и покровцы кожы овни очервлены, и покровы кожы синия, и прочих опоны:

²¹ и колки, и вся орудия на дела скинии свидения:

²² елика заповеда Господь Моисею, тако сотвориша сынове Израилевы все устроение.

²³ И виде Моисей вся дела, и бяху сотворена та, якоже заповеда Господь Моисею, тако сотвориша я, и благослови их Моисей.