¹ И глагола Господь вся словеса сия к Моисею глаголя:

² Аз есмь Господь Бог твой, изведый тя от земли Египетския, от дому работы:

³ да не будут тебе бози инии разве Мене.

⁴ Не сотвори себе кумира и всякаго подобия, елика на небеси горе и елика на земли низу, и елика в водах под землею:

⁵ да не поклонишися им, ни послужиши им: Аз бо есмь Господь Бог твой, Бог ревнитель, отдаяй грехи отец на чада до третияго и четвертаго рода ненавидящым Мене,

⁶ и творяй милость в тысящах любящым Мя и хранящым повеления Моя.

⁷ Не возмеши имене Господа Бога твоего всуе: не очистит бо Господь приемлющяго имя Его всуе.

⁸ Помни день субботный, еже святити его:

⁹ шесть дний делай и сотвориши (в них) вся дела твоя:

¹⁰ в день же седмый, суббота Господу Богу твоему: да не сотвориши всякаго дела в онь ты и сын твой и дщерь твоя, и раб твой и раба твоя, и вол твой и осля твое и всякий скот твой, и пришлец обитаяй у тебе:

¹¹ зане в шести днех сотвори Господь небо и землю, море и вся яже в них, и почи в день седмый: сего ради благослови Господь день седмый и освяти его.

¹² Чти отца твоего и матерь твою, да благо ти будет и да долголетен будеши на земли блазе, юже Господь Бог твой дает тебе.

¹³ Не убий.

¹⁴ Не прелюбы сотвори.

¹⁵ Не укради.

¹⁶ Не послушествуй на друга своего свидетелства ложна.

¹⁷ Не пожелай жены искренняго твоего, не пожелай дому ближняго твоего, ни села его, ни раба его, ни рабыни его, ни вола его, ни осла его, ни всякаго скота его, ни всего, елика суть ближняго твоего.

¹⁸ И вси людие зряху глас и свещы, и глас трубный и гору дымящуюся: и убоявшеся вси людие сташа издалече,

¹⁹ и рекоша Моисею: глаголи ты с нами, и да не глаголет к нам Бог, да не когда умрем.

²⁰ Рече же им Моисей: дерзайте: искушения бо ради прииде Бог к вам, яко да будет страх Его в вас, да не согрешаете.

²¹ Стояху же вси людие издалече: Моисей же вниде во мрак, идеже бяше Бог.

²² Рече же Господь к Моисею: сия речеши дому Иаковлю и возвестиши сыном Израилевым: вы видесте, яко с небесе глаголах к вам:

²³ не сотворите себе сами богов сребряных и богов златых не сотворите самым себе:

²⁴ олтарь из земли сотворите Ми и пожрете на нем всесожжения ваша и спасителная ваша, и овцы и телцы вашя, на всяком месте, идеже нареку имя Мое тамо, и прииду к тебе и благословлю тя:

²⁵ аще же олтарь от камений сотвориши Ми, да не устроиши их тесаных: сечиво бо твое аще возложиши на них, то осквернятся:

²⁶ да не взыдеши по степенем ко олтарю Моему, яко да не открыеши срамоты твоея на нем.