¹ Рече же Господь к Моисею и Аарону в земли Египетстей, глаголя:

² месяц сей вам начало месяцей, первый будет вам в месяцех лета:

³ рцы ко всему сонму сынов Израилевых, глаголя: в десятый месяца сего да возмет кийждо овча по домом отечеств, кийждо овча по дому:

⁴ аще же мало их есть в дому, яко не доволным быти на овча, да возмет с собою соседа ближняго своего по числу душ: кийждо доволное себе сочтет на овча:

⁵ овча совершенно, мужеск пол, непорочно и единолетно будет вам, от агнец и от козлищ приимете:

⁶ и будет вам соблюдено даже до четвертагонадесять дне месяца сего: и заколют то все множество собора сынов Израилевых к вечеру,

⁷ и приимут от крове и помажут на обою подвою и на прагах в домех, в нихже снедят тое,

⁸ и снедят мяса в нощи той печена огнем и опресноки с горьким зелием снедят:

⁹ не снесте от них сурово, ниже варено в воде, но печеное огнем, главу с ногами и со утробою:

¹⁰ не оставите от него до утрия и кости не сокрушите от него, останки же от него до утра огнем сожжете:

¹¹ сице же снесте е: чресла ваша препоясана, и сапози ваши на ногах ваших, и жезлы ваши в руках ваших, и снесте е со тщанием: Пасха есть Господня:

¹² и пройду землю Египетскую сея нощи, и убию всякаго первенца в земли Египетстей, от человека до скота, и во всех бозех Египетских сотворю отмщение: Аз Господь:

¹³ и будет кровь вам в знамение на домех, в нихже вы будете тамо, и узрю кровь и покрыю вы, и не будет в вас язвы, еже погибнути, егда поражу землю Египетскую:

¹⁴ и будет вам день сей в память, и празднуйте той праздник Господу во вся роды вашя: законно вечно празднуйте его:

¹⁵ седмь дний опресноки ядите, от перваго же дне измите квас из домов ваших: всяк, иже снесть кисло, погибнет душа та от Израиля, от дне перваго даже до дне седмаго:

¹⁶ и первый день наречется свят, и седмый день нарочит свят да будет вам: всякаго дела работна да не сотворите в них, разве елика (снести) сотворятся всякой души, сия точию да сотворятся вам:

¹⁷ и сохраните заповедь сию: в сей бо день изведу силу вашу от земли Египетския: и сотворите день сей в роды вашя, законно вечно:

¹⁸ начинающе в четвертыйнадесять день перваго месяца, с вечера да снесте опресноки, до двадесять перваго дне месяца, до вечера:

¹⁹ седмь дний квас да не явится в домех ваших: всяк, иже аще снесть квасно, погубится душа та от сонма сынов Израилевых и в пришелцех и в жителех тоя земли:

²⁰ всякаго кваснаго да не ясте, во всех же домех ваших да ясте опресноки.

²¹ Созва же Моисей вся старцы сынов Израилевых и рече им: шедше поимите себе овча по сродством вашым и пожрите пасху:

²² возмите же кисть иссопа, и омочивше в кровь, яже близ дверий, помажите праги, и на обою подвою, от крове, яже есть близ дверий: вы же да не изыдете кийждо из дверий дому своего до заутрия:

²³ и мимо пройдет Господь избити Египтяны, и узрит кровь на празе и на обою подвою, и минет Господь двери, и не попустит погубляющему внити в домы вашя убивати:

²⁴ и сохраните слово сие законно себе и сыном вашым до века:

²⁵ аще же внидете в землю, юже даст Господь вам, якоже глагола, сохраните служение сие,

²⁶ и будет егда возглаголют вам сынове ваши: что есть служение сие?

²⁷ И рцыте им: жертва пасха сия Господу, Иже покры домы сынов Израилевых во Египте, егда поби Египтяны, домы же нашя избави. И преклоншеся людие поклонишася.

²⁸ И отшедше сотвориша сынове Израилевы, якоже заповеда Господь Моисею и Аарону, тако сотвориша.

²⁹ Бысть же в полунощи, и Господь порази всякаго первенца в земли Египетстей, от первенца фараонова седящаго на престоле, до первенца пленницы, яже в рове, и до первенца всякаго скотска.

³⁰ Воста же фараон нощию, и вси раби его, и вси Египтяне, и бысть вопль велик по всей земли Египетстей, ибо не бысть дом, в немже не бе мертвеца.

³¹ И призва фараон Моисеа и Аарона в нощи и рече им: востаните и отидите от людий моих, и вы, и сынове Израилевы: идите и послужите Господу Богу вашему, якоже глаголете:

³² и овцы и говяда вашя поимше идите, благословите же и мене.

³³ И нуждаху Египтяне людий со тщанием изринути их от земли: рекоша бо, яко вси мы измрем.

³⁴ Взяша же людие муку свою прежде вскисения теста своего, и ввязавше в ризы, (возложиша) на рамы своя.

³⁵ Сынове же Израилевы сотвориша, якоже заповеда им Моисей: и испросиша от Египтян сосуды сребряны и златы, и ризы:

³⁶ и даде Господь благодать людем Своим пред Египтяны: и даша им, и обраша Египтян.

³⁷ Воздвигошася же сынове Израилевы от Рамессы в Сокхоф до шести сот тысящ пеших мужей, кроме домочадства:

³⁸ и пришелцы мнози изыдоша с ними, и овцы, и волы, и скоти мнози зело.

³⁹ И испекоша тесто, еже изнесоша из Египта, опресноки не кислы, не вскисоша бо: ибо изгнаша их Египтяне, и не возмогоша помедлити, ниже брашна сотвориша себе на путь.

⁴⁰ Обитания же сынов Израилевых, иже обиташа в земли Египетстей и в земли Ханаани сии и отцы их, лет четыреста тридесять.

⁴¹ И бысть по четырех стех и тридесяти летех, изыде вся сила Господня от земли Египетския в нощи.