¹ Прииде же Ровоам во Иерусалим, и созва (весь) дом Иудин и Вениаминь, сто осмьдесят тысящ избранных юношей творящих брань, и воеваше противу Израиля и Иеровоама, да обратит к себе царство.

² И бысть слово Господне к Самею человеку Божию, глаголя:

³ глаголи к Ровоаму сыну Соломоню, царю Иудину, и ко всему Израилю, иже есть во Иуде и Вениамине:

⁴ сия рече Господь: не восходите, ниже ополчайтеся противу братии вашея: возвратитеся кийждо в дом свой, зане от Мене бысть глаголгол сей. И послушаша слова Господня, и возвратишася, и не поидоша противу Иеровоама.

⁵ Обита же Ровоам во Иерусалиме и созда грады стенаты во Иудеи:

⁶ сострои же Вифлеем и Етам, и Фекуе

⁷ и Вефсур, и Сокхоф и Одоллам,

⁸ и Геф и Марисан, и Зиф

⁹ и Адурем, и Лахис и Азику,

¹⁰ и Салаю и Елон и Хеврон, иже есть Иудин и Вениаминь, грады крепкия:

¹¹ и укрепи их стенами, и постави в них началники, житохранилища, и елей и вино,

¹² во всяцем граде щиты и копия, и укрепи их во множестве зело, и быста под ним Иуда и Вениамин.

¹³ Священницы же и левиты, иже бяху во всем Израили, собрашася к нему от всех предел:

¹⁴ яко оставиша левити селения одержания своего и поидоша ко Иуде во Иерусалим, понеже изгна их Иеровоам и сынове его, еже не служити Господеви:

¹⁵ и постави себе жерцы на высоких, и идолом, и суетным, и телцем, ихже сотвори Иеровоам.

¹⁶ И изгна их от всех колен Израилевых, иже вдаша сердце свое, да взыщут Господа Бога Израилева: и приидоша во Иерусалим пожрети Господу Богу отец своих:

¹⁷ и укрепиша царство Иудино. И укрепися Ровоам сын Соломонь в три лета, хождаше бо по путем Давида и Соломона отца своего лета три.

¹⁸ И взя себе Ровоам жену Моолафу, дщерь Иеримофа сына Давидова, и Авигею дщерь Елиава сына Иессеова.

¹⁹ И роди ему сыны: Иеуса и Самориа и Заама.

²⁰ По сих же поя себе Мааху дщерь Авессаломлю, и роди ему Авию и Иеффиа, и Зизу и Салимофа.

²¹ И возлюби Ровоам Мааху дщерь Авессаломлю паче всех жен своих и подложниц своих, яко жен осмьнадесять име и подложниц шестьдесят: и роди двадесять осмь сынов и шестьдесят дщерей.

²² И постави в началника Ровоам Авию сына Маахина и князем над всею братиею его, того бо и царем сотворити помышляше.

²³ И возрасте паче всех братий своих во всех пределех Иудиных и Вениаминих и во градех крепких, и даде им пищи множество много, и многих взыска жен.