¹ Точию вдаяй душу свою и размышляяй в законе Вышняго премудрости всех древних взыщет и во пророчествиих поучатися будет:

² повести мужей именитых соблюдет и во извития притчей совнидет,

³ сокровенная притчей изыщет и в гадании притчей поживет,

⁴ посреде вельмож послужит и пред старейшину явится,

⁵ в земли чуждих язык пройдет, добро бо и зло в человецех искуси.

⁶ Сердце свое вдаст утреневати ко Господу сотворшему его и пред Вышним помолится, и отверзет уста своя на молитву и о гресех своих помолится.

⁷ Аще Господь велий восхощет, духом разума исполнится:

⁸ той одождит глаголы премудрости своея и в молитве исповестся Господеви,

⁹ той управит совет его и художество и в сокровенных его размышляти будет,

¹⁰ той известит наказание учения его и в законе завета Господня похвалится.

¹¹ Восхвалят разум его мнози, и до века не погибнет:

¹² не отидет память его, и имя его поживет в роды родов:

¹³ премудрость его поведят языцы, и хвалу его исповесть церковь.

¹⁴ Аще пребудет, приусвоит себе, и аще почиет, имя оставит паче тысящ.

¹⁵ Еще размыслив повем, и якоже луны полнота наполнихся.

¹⁶ Послушайте мене, преподобнии сынове, и прозябните яко шипки произрастающыя при потоце селнем,

¹⁷ и якоже Ливан дадите благовоние,

¹⁸ и процветите цвет яко крин, преподадите воню и воспойте песнь.

¹⁹ Благословите Господа во всех делех Его, дадите имени Его величие и исповедайтеся во хвалении Его,

²⁰ в песнех устен и в гуслех, и сице рцыте во исповедании:

²¹ дела Господня вся яко добра зело, и всяко повеление во время свое будет.

²² И несть рещи: что сие? На что сие? Вся бо сия во время свое взыскана будут.

²³ Словом Его ста вода яко стог, и глаголголом уст Его приятелища водная.

²⁴ Повелением Его всякое благоволение, и несть, иже умалит спасение Его.

²⁵ Дела всякия плоти пред Ним, и несть укрытися от очес Его:

²⁶ от века на век призре, и ничтоже есть дивно пред Ним.

²⁷ Несть рещи: что сие? На что сие? Вся бо на потребу их создана быша.

²⁸ Благословение Его яко река покры и яко поток сушу напои:

²⁹ сице гнев Его языцы наследят, яко преврати воду в сланость.

³⁰ Путие Его преподобным прави, тако беззаконником претыкания.

³¹ Благая благим создана быша из начала, такожде грешным злая.

³² Начало всякия потребы в житие человеку, вода и огнь, и железо и соль, и семидал пшеницы и млеко и мед, кровь гроздова и масло и риза:

³³ вся сия благочестивым во благая, сице и грешником превратятся во злая.

³⁴ Суть дуси, иже создани быша на месть и яростию своею утвердиша раны им:

³⁵ во время скончания излиют крепость и ярость Сотворшаго их совершат.

³⁶ Огнь и град, и глад и смерть, вся сия создана быша на месть:

³⁷ зубы зверей и скорпии, и ехидны и мечь отмщаяй в погибель нечестивых,

³⁸ в заповедех Его возвеселятся, и на земли на потребу уготовятся, и во бременах своих не имут прейти слова.

³⁹ Сего ради исперва утвердихся и размыслих и в писании оставих:

⁴⁰ вся дела Господня блага, и всю потребу во время свое подаст:

⁴¹ и несть рещи: сие сего злее: вся бо во время на угождение будут.

⁴² И ныне всем сердцем и усты воспойте и благословите имя Господне.