¹ И воста Илиа пророк яко огнь, и слово его яко свеща горяше:

² иже нанесе на ня глад и ревностию своею умали я,

³ словом Господним удержа небо и сведе тако трижды огнь с небесе.

⁴ Коль прославился еси, Илие, чудесы твоими, и кто подобен тебе похвалитися?

⁵ Воздвигнув мертвеца от смерти и из ада словом Вышняго,

⁶ сведый цари в пагубу и прославленныя от одра их,

⁷ слышавый в Синаи обличение и в Хориве судбы отмщения,

⁸ помазуяй цари на воздаяние и пророки преемники по себе,

⁹ взявыйся вихром огненным на колеснице коней огненных,

¹⁰ вписан во обличения на времена, утолити гнев прежде ярости и обратити сердце отчее к сыну и устроити колена Иаковля.

¹¹ Блажени видевшии тя и любовию украшеннии.

¹² Ибо мы житием поживем.

¹³ Илиа, иже вихром покровен бысть, и Елиссей исполнися духа его и во дни своя не поколебася от князей, и не преможе его никтоже:

¹⁴ всяко слово не превзыде его, и во успении пророчествова тело его:

¹⁵ и в житии своем сотвори чудеса, и во умертвии дивна дела его.

¹⁶ Во всех сих не покаяшася людие и не отступиша от грех своих, дондеже пленени быша от земли своея и расточени быша по всей земли.

¹⁷ И остася людий мало, и князь в дому Давидове.

¹⁸ Нецыи убо от них сотвориша угодное, нецыи же умножиша грехи.

¹⁹ Езекиа утверди град свой и введе посреде его воду: ископа железом камень и созда источники водам.

²⁰ Во днех его взыде Сеннахирим и посла Рапсака, и воздвиже руку свою на Сиона и возвеличися гордынею своею.

²¹ Тогда подвигошася сердца и руце их, и поболеша яко раждающыя.

²² И помолишася Господу милостивому, воздевше руки своя к Нему:

²³ и Святый с небесе скоро услыша я и избави я рукою Исаииною:

²⁴ порази полки Ассирийския, и сокруши я Ангел Его.

²⁵ Сотвори бо Езекиа угодное Господеви и укрепися на путех Давида отца своего, яже заповеда Исаиа, пророк велий и верен в видении своем.

²⁶ Во днех его воспятися солнце, и приложи жития цареви:

²⁷ духом велиим виде последняя и утеши сетующыя в Сионе:

²⁸ даже до века показа будущая и сокровеная, прежде неже приити им.