¹ כי ימצא חלל באדמה אשר יהוה אלהיך נתן לך לרשתה נפל בשדה לא נודע מי הכהו

² ויצאו זקניך ושטריך ומדדו אל הערים אשר סביבת החלל

³ והיה העיר הקרובה אל החלל ולקחו זקני העיר ההיא עגלת בקר אשר לא עבד בה ואשר לא משכה בעל

⁴ והורידו זקני העיר ההיא את העגלה אל נחל איתן אשר לא יעבד בו ולא יזרע וערפו שם את העגלה בנחל

⁵ ונגשו הכהנים בני לוי כי בם בחר יהוה אלהיך לשרת ולברך בשם יהוה ועל פיהם יהיה כל ריב וכל נגע

⁶ וכל זקני העיר ההיא הקרובים אל החלל ירחצו את ידיהם על העגלה הערופה בנחל

⁷ וענו ואמרו ידינו לא שפכו את הדם הזה ועינינו לא ראו

⁸ כפר לעמך ישראל אשר פדית יהוה ואל תתן דם נקיא בקרב עמך ישראל ונכפר להם הדם

⁹ ואתה תבער הדם הנקיא מקרבך כי תעשה הישר בעיני יהוה

¹⁰ כי תצא למלחמה על איביך ונתנו יהוה אלהיך בידך ושבית שביו

¹¹ וראית בשביו אשה יפת תאר וחשקת בה ולקחת לך לאשה

¹² והבאתה אל תוך ביתך וגלחה את ראשה ועשתה את צפרניה

¹³ והסירה את שמלת שביה מעליה וישבה בביתך ובכתה את אביה ואת אמה ירח ימים ואחר כן תבוא אליה ובעלתה והיתה לך לאשה

¹⁴ והיה אם לא חפצת בה ושלחתה לנפשה ומכר לא תמכרנה בכסף לא תתעמר בה תחת אשר עניתה

¹⁵ כי תהיינה לאיש שתי נשים אחת אהובה ואחת שנואה וילדו לו בנים האהובה והשנואה והיה הבן הבכור לשנואה

¹⁶ והיה ביום הנחילו את בניו את אשר יהיה לו לא יוכל לבכר את בן האהובה על פני בן השנואה הבכור

¹⁷ כי את הבכור בן השנואה יכיר לתת לו פי שנים בכל אשר ימצא לו כי הוא ראשית אונו ולו משפט הבכרה

¹⁸ כי יהיה לאיש בן סורר ומורה איננו שמע בקול אביו ובקול אמו ויסרו אתו ולא ישמע אליהם

¹⁹ ותפשו בו אביו ואמו והוציאו אתו אל זקני עירו אל שער מקומו

²⁰ ואמרו אל אנשי עירו בננו זה סורר ומורה איננו שמע בקולנו זולל וסובא

²¹ ורגמהו כל אנשי עירו באבנים ומת ובערת הרע מקרבך וכל ישראל ישמעו וייראו

²² כי יהיה באיש חטא משפט מות והומת ותלית אתו על העץ

²³ לא תלין נבלתו על העץ כי קבר תקברנו ביום ההוא כי קללת אלהים תלאי ולא תטמא את אדמתך אשר יהוה אלהיך נתן לך נחלה