¹ Då tala Herren til Moses, og sagde:

² «Den fyrste dagen i den fyrste månaden skal du reisa møtetjeldhuset.

³ Der skal du setja lovtavlekista, og hengja forhenget attfor kista.

⁴ So skal du setja inn bordet, og på det skal du skipa det som på det skal vera. Og du skal bera inn ljosestaken, og setja upp lamporne på honom.

⁵ Det gullklædde røykjelsesaltaret skal du setja framanfor lovtavlekista, og so skal du hengja upp dørtæpet i husdøri.

⁶ Brennofferaltaret skal du setja framanfor døri til møtetjeldhuset,

⁷ og balja skal du setja millom møtetjeldet og altaret, og hava vatn upp i henne,

⁸ og so skal du setja upp garden kring tunet, og hengja upp tæpet i tunporten.

⁹ Sidan skal du taka salvingsoljen, og salva huset og alt som i det er, og vigsla både huset og all bunaden i det, so det vert heilagt.

¹⁰ Og du skal salva brennofferaltaret og alt det som til høyrer, og vigsla altaret, og då skal altaret vera høgheilagt.

¹¹ Og du skal salva balja og foten ho stend på og vigsla henne.

¹² So skal du kalla Aron og sønerne hans burtåt møtetjelddøri, og två deim med vatn,

¹³ og du skal klæda Aron i den heilage klædebunaden, og salva honom og vigsla honom, og so skal han vera prest for meg.

¹⁴ Og sønerne hans skal du og kalla fram og klæda deim med underkjolar,

¹⁵ og salva deim, liksom du salva far deira, so dei kann vera prestar for meg, og salvingi skal gjeva deim retten til preste-embættet, mann etter mann, i all æva.»

¹⁶ Og Moses gjorde so: han gjorde i alle måtar som Herren sagde honom fyre.

¹⁷ Den fyrste månaden av det andre året, den fyrste dagen i månaden, var det at huset vart reist.

¹⁸ Då reiste Moses huset: han sette ned stabbarne og reiste upp plankarne, lagde inn tverstokkarne og sette upp stolparne,

¹⁹ so spana han ut tjeldet yver huset, og lagde tjeldtaket ovanpå, alt soleis som Herren hadde sagt Moses fyre.

²⁰ So tok han og lagde lovtavlorne ned i kista, og sette stengerne i, og sette loket yver kista.

²¹ Og kista sette han inn i gudshuset, og feste upp forhengtæpet, so det hekk attfor lovtavlekista, alt soleis som Herren hadde sagt Moses fyre.

²² So sette han bordet i møtetjeldet, innåt nørdre husveggen, utanfor forhenget,

²³ og skipa brødi i rader på det for Herrens andlit, alt soleis som Herren hadde sagt Moses fyre.

²⁴ Ljosestaken sette han og i møtetjeldet, midt for bordet, innmed søre husveggen,

²⁵ og sette upp lamporne for Herrens åsyn, alt soleis som Herren hadde sagt Moses fyre.

²⁶ Gullaltaret og sette han i møtetjeldet, framanfor forhenget,

²⁷ og brende angande røykjelse på det, alt soleis som Herren hadde sagt Moses fyre.

²⁸ So hengde han upp dørtæpet,

²⁹ og sette brennofferaltaret frammed døri til møtetjeldhuset, og ofra brennoffer og grjonoffer på det, alt soleis som Herren hadde sagt Moses fyre.

³⁰ Balja sette han millom møtetjeldet og altaret, og hadde vatn i henne som dei skulde två seg med,

³¹ og Moses og Aron og sønerne hans tok av vatnet og tvo hender og føter;

³² kvar gong dei gjekk inn i møtetjeldet eller fram åt altaret, so tvo dei seg, alt soleis som Herren hadde sagt Moses fyre.

³³ So sette han upp garden kringum huset og altaret, og hengde upp tæpet i tunporten, og so var Moses ferdig med verket.

³⁴ Då sveipte skyi seg kringum møtetjeldet, og herlegdomen åt Herren fyllte huset.

³⁵ Og Moses kunde ikkje koma inn i møtetjeldet, av di at skyi låg yver tjeldet, og herlegdomen åt Herren fyllte huset.

³⁶ Og kvar gong skyi lyfte seg ifrå gudshuset, tok Israels-folket ut; so gjorde dei på alle ferderne sine.

³⁷ Men når skyi ikkje lyfte seg, so tok dei ikkje ut, men drygde til den dagen ho lyfte seg att.

³⁸ For Herrens sky låg yver huset um dagen, og um natti skein ho som eld for augo åt heile Israels-ætti på alle ferderne deira.