¹ Huset skal du gjera av ti åklædevever av kvitt tvinna lingarn og purpur og skarlak og karmesin, og i deim skal du veva inn fagre englebilæte.

² Kvar vev skal vera åtte og tjuge alner lang og fire alner breid: alle veverne skal halda same målet.

³ Fem av veverne skal skøytast i hop til eitt tæpe, og sameleis dei hine fem veverne.

⁴ I jaren på den fyrste veven, ytst på det eine tæpet, skal du gjera lykkjor av purpurgarn, og sameleis i jaren på den ytste veven i det andre tæpet.

⁵ Femti lykkjor skal du gjera på den fyrste veven, og femti lykkjor i jaren på den som høyrer til det andre tæpet; lykkjorne skal svara mot kvarandre.

⁶ Og femti gullkrokar skal du gjera og hekta åklædetæpi i hop, so det vert eit hus av deim.

⁷ So skal du veva ryor av geiteragg til tekkja yver huset; elleve ryor skal du veva.

⁸ Kvar vev skal vera tretti alner lang og fire alner breid; alle dei elleve veverne skal halda same målet.

⁹ Fem av ryeveverne skal du skøyta i hop til eit tæpe for seg, og dei hine seks til eit anna tæpe, og den sette veven skal du bretta i hop på framsida av taket.

¹⁰ I jaren på den fyrste veven, den som er ytst i det eine tæpet, skal du gjera femti lykkjor, og i jaren på den andre skøytingsveven femti lykkjor.

¹¹ Og femti koparkrokar skal du gjera, og hekta deim i lykkjorne, og soleis festa raggetæpi i hop, so det vert eitt tak av deim.

¹² Vil du vita kva du skal gjera med det som gjeng av på raggetæpi, so skal helvti av den veven som gjeng av, hanga ned på baksida av huset,

¹³ og den eine alni på kvar led som raggetæpi er for lange, skal hengjast ned etter båe sideveggjerne, til livd for huset.

¹⁴ Yver raggetæpi skal du gjera eit tak av raudlita verskinn, og ovanpå det att eit tak av markuskinn.

¹⁵ Veggjerne i huset skal du gjera av akazieplankar. Plankarne skal reisast på ende;

¹⁶ dei skal vera ti alner lange og halvonnor aln breide,

¹⁷ og på kvar av deim skal det vera tvo tappar med ei tverlist imillom. So skal du gjera med alle plankarne i huset.

¹⁸ Tjuge av dei plankarne du gjer til huset, skal du reisa på solsida, mot sud.

¹⁹ Og fyrti sylvstabbar skal du gjera og setja under dei tjuge plankarne, tvo under kvar planke, til å festa båe tapparne i.

²⁰ På den andre sida av huset, på nordsida, skal det og vera tjuge plankar,

²¹ med sine fyrti sylvstabbar, tvo under kvar planke.

²² Til baksida av huset, mot vest, skal du gjera seks plankar,

²³ og til hyrno på den same sida tvo plankar;

²⁴ dei skal vera tviluta alt nedantil, og båe luterne skal halda fullt mål heilt upp åt taket, til den fyrste ringen; so skal dei vera laga båe tvo; dei skal standa i kvar sitt hyrna.

²⁵ Soleis vert det på baksida åtte plankar med sylvstabbarne sine, tvo under kvar planke.

²⁶ So skal du gjera tverstokkar av akazietre, fem til den eine langveggen på huset,

²⁷ og fem til den andre langveggen, og fem til tverveggen på baksida av huset, mot vest.

²⁸ Midtstokken, den som er midt på plankeveggen, skal ganga langs etter heile veggen, frå ende til ende.

²⁹ Plankarne skal du klæda med gull, og ringarne på deim som tverstokkarne ligg i, skal du gjera heiltupp av gull; tverrstokkarne skal du og gullklæda.

³⁰ Du lyt setja upp huset på rette gjerdi, soleis som det vart synt deg på fjellet.

³¹ So skal du gjera eit forheng av purpur og skarlak og karmesin og kvitt tvinna lingarn; væne englebilæte skal vera innvovne i det.

³² Du skal festa det til fire gullklædde akaziestolpar, som det er gullhakar på, og som stend på fire sylvstabbar,

³³ og so skal du hengja det upp etter krokarne. Innanfor forhenget skal du setja lovtavlekista; og forhenget skal for dykk vera skilnaden millom det heilage og det heilagste romet.

³⁴ So skal du leggja loket på lovtavlekista, der ho stend i det heilagste romet.

³⁵ Bordet skal du setja utanfor forhenget, og ljosestaken midt imot bordet, innmed den søre veggen i huset; for bordet skal du setja innåt nordveggen.

³⁶ Til døri på tjeldet skal du gjera eit tæpe av purpur og skarlak og karmesin og kvitt tvinna lingarn. Det skal vera utsauma med rosor.

³⁷ Du skal gjera fem akaziestolpar til det, og deim skal du gullklæda; dei skal hava hakar av gull, og du skal støypa fem koparstabbar til deim.