¹ И Давид стар и исполнен дний, и воцари Соломона сына своего вместо себе над Израилем:

² и собра всех князей Израилевых, и священников, и левитов:

³ сочтени же быша левити, от тридесяти лет и вышше, и бысть число их по главам их, мужей тридесять и осмь тысящ:

⁴ от сих избрани на дела дому Господня двадесять четыри тысящы, и книгочей и судий шесть тысящ,

⁵ и четыри тысящы дверников, и четыри тысящы поющих Господеви во органы, ихже сотвори ко хвалению Господню.

⁶ И раздели их Давид на чреды сыном Левииным, Гирсону, Каафу и Мераре:

⁷ и Гирсону и Леадану и Семею.

⁸ Сынове Леадани: началник Иеиил и Зефоф и Иоиль, трие.

⁹ Сынове же Семеовы: Саломиф и Азаил и Арам, трие: сии началницы отечеств Леаданих.

¹⁰ И сыном Семеовым Иеф и Зизай, и Иоас и Вериа: тии сынове Семеовы четыре.

¹¹ Бе же Иеф первый и Зизай вторый: Иоас же и Вариа не иместа многих сынов и быста в дому отечества в причтение едино.

¹² Сынове Каафовы: Амврам и Иссаар, Хеврон, Озиил, четыри.

¹³ Сынове Амврамли: Аарон и Моисей: отлучен же бысть Аарон еже освящати Святая Святых, той и сынове его во веки, и да кадит фимиамом пред Господем, служит Ему и молится во имя Его до века.

¹⁴ Моисей же человек Божий и сынове его причтени суть в колено Левиино.

¹⁵ Сынове Моисеовы: Гирсам и Елиезер.

¹⁶ Сынове Гирсамли, Суваил началник.

¹⁷ Быша же сынове Елиезеру, Равиа началник: и не беша Елиезеру сынове инии: сынове же Равиини умножени суть зело.

¹⁸ Сынове Иссааровы, Саллумоф началник.

¹⁹ Сынове Хеврони: Иериав первый, Амариа вторый, Иазиил третий Иезекиа четвертый.

²⁰ Сынове же Озиили: Миха первый, и Иессиа вторый.

²¹ Сынове Мерарины: Мооли и Муси.

²² Сынове моолиевы: Елеазар и Кис. Умре же Елеазар, и не быша ему сынове, но токмо дщери: и пояша их сынове Кисовы братия их.

²³ Сынове Мусиины: Мооли и Едер и Иаримоф, трие.

²⁴ Сии сынове Левиини по домом отечеств их, началницы отечеств их, по согляданию их, по числу имен их, по главам их, иже творяху дела служения дому Господня, от двадесяти лет и вышше.

²⁵ Рече бо Давид: покой даде Господь Бог людем Своим Израилю, и вселися во Иерусалиме даже да века,

²⁶ и левити не быша носяще скинию и вся сосуды ея к служению ея.

²⁷ По повелению бо Давидову последнему есть число сыновом Левииным от двадесяти лет и вышше:

²⁸ зане постави их под руку сыном Аароним, еже служити в дому Господни во дворех и в притворех, и во очищении всех святынь, и в делех служения дому Божия,

²⁹ и над хлебами предложения, и над мукою пшеничною жертвы, и над пряжмами опресночными, и над сковрадою, и над печеным, и над всяким весом и мерою,

³⁰ и еже стояти, утро хвалити и исповедатися Господеви, такожде и к вечеру,

³¹ и над всеми возносимыми всесожжении Господеви в субботы, и в новомесячиих, и в праздницех, по числу, по чину их выну Господеви,

³² и да сохранят стражбы скинии свидения, и стражу святилища, и стражбы сынов Аароних братий своих, да служат в дому Господни.