¹ Что бысть тебе, яко ныне возлезосте вси на храмины тщетныя?

² Наполнися град вопиющих, уязвленнии твои не мечьми уязвлени, ниже мертвецы твои умерщвлени ратию:

³ вси князи твои побегоша, и плененнии жестоце суть связани, и крепцыи в тебе далече отбежаша.

⁴ Сего ради рекох: оставите мене, да горце восплачуся: не належите утешати мя о сокрушении дщере рода моего:

⁵ яко день мятежа и пагубы и попрания, и смятение от Господа Саваофа: в дебри Сиони скитаются, от мала даже до велика скитаются по горам.

⁶ Еламите же взяша тулы, и всадницы человецы на конех, и собор ополчения.

⁷ И будут избранны дебри твоя, наполнятся колесниц, конницы же заступят врата твоя

⁸ и открыют врата Иудина, и воззрят в той день во избранныя домы града,

⁹ и открыют сокровенная домов краеградия Давидова, и узрят, яко множайшии суть, и яко отвратиша воду древния купели во град,

¹⁰ и яко разориша домы Иерусалимли на утверждение стене градней.

¹¹ И сотвористе себе воду между двема стенама, внутрьуду купели древния, и не воззресте на Сотворившаго ю исперва, и Сограждшаго ю не видесте.

¹² И призва Господь, Господь Саваоф в той день плачь и рыдание, и острижение и препоясание во вретища:

¹³ тии же сотвориша радость и веселие, закалающе телцы и жруще овцы, яко ясти мяса и пити вино, глаголюще: да ямы и пием, утре бо умрем.

¹⁴ И откровенна сия суть во ущию Господа Саваофа, яко не оставится вам той грех, дондеже умрете.

¹⁵ Сице глаголет Господь Саваоф: иди в кущу ко Сомнану строителю дому и рцы ему:

¹⁶ что ты зде, и что тебе зде, яко истесал еси себе зде гроб и сотворил еси себе на высоце гроб, и написал еси себе на камени кущу?

¹⁷ Се, ныне Господь Саваоф извержет и сотрет мужа, и отимет утварь твою и венец твой славный,

¹⁸ и повержет тя во страну велику и безмерну, и тамо умреши: и положит колесницу твою добрую в безчестие и дом князя твоего в попрание:

¹⁹ и извержешися от строителства твоего и от степене твоего.

²⁰ И будет в той день, и призову раба Моего Елиакима сына Хелкиева

²¹ и облеку его во утварь твою, и венец твой дам ему и державу твою, и строителство твое дам в руце его, и будет яко отец живущым во Иерусалиме и живущым во Иудеи.

²² И дам ему славу Давидову, и обвладеет, и не будет противоглаголющаго: и дам ему ключь дому Давидова на рамо его, и отверзет, и не будет затворяющаго, и затворит, и не будет отверзающаго.

²³ И поставлю его князя на месте верне, и будет на престоле славы дому отца своего.

²⁴ И будет уповаяй на него всяк славный в дому отца его, от мала даже до велика: и будут зависяще на нем.

²⁵ В той день, сия глаголет Господь Саваоф, подвигнется человек утвержден на месте верне, и отимется, и падет, и потребится слава, яже на нем, яко Господь глагола.