¹ Утешайте, утешайте люди Моя, глаголет Бог:

² священницы, глаголите в сердце Иерусалиму, утешайте и, яко наполнися смирение его, разрешися грех его, яко прият от руки Господни сугубы грехи своя.

³ Глас вопиющаго в пустыни: уготовайте путь Господень, правы сотворите стези Бога нашего:

⁴ всяка дебрь наполнится, и всяка гора и холм смирится, и будут вся стропотная в право, и острая в пути гладки.

⁵ И явится слава Господня, и узрит всяка плоть спасение Божие, яко Господь глагола.

⁶ Глас вопиющаго: возопий. И рекох: что возопию? Всяка плоть сено, и всяка слава человеча яко цвет травный:

⁷ изсше трава, и цвет отпаде,

⁸ глаголгол же Бога нашего пребывает во веки.

⁹ На гору высоку взыди, благовествуяй Сиону, возвыси крепостию глас твой, благовествуяй Иерусалиму: возвысите, не бойтеся. Рцы градом Иудиным:

¹⁰ се, Бог ваш, се, Господь, Господь со крепостию идет, и мышца Его со властию: се, мзда Его с Ним, и дело Его пред Ним:

¹¹ аки пастырь упасет паству Свою, и мышцею Своею соберет агнцы, и имущыя во утробе утешит.

¹² Кто измери горстию воду и небо пядию и всю землю горстию? Кто постави горы в мериле и холмы в весе?

¹³ Кто уразуме ум Господень, и кто советник Ему бысть, иже научает Его?

¹⁴ Или с ким советова, и настави И? Или кто показа Ему суд? Или путь разумения кто показа Ему? Или кто прежде даде Ему, и воздастся Ему?

¹⁵ Аще вси языцы, аки капля от кади, и яко претяжение веса вменишася, и аки плюновение вменятся?

¹⁶ Дубрава же Ливанова не доволна на сожжение, и вся четвероногая не доволна на всесожжение.

¹⁷ И вси языцы яко ничтоже суть, и в ничтоже вменишася.

¹⁸ Кому уподобисте Господа, и коему подобию уподобисте Его?

¹⁹ Еда образ сотвори древоделатель, или златарь слияв злато позлати его, или подобием сотвори его?

²⁰ Древо бо негниющее избирает древоделатель и мудре ищет, како поставит образ его, и да не поколеблется.

²¹ Не разуместе ли, не слышасте ли, не возвестися ли вам исперва? Не разуместе ли основания земли?

²² Содержай круг земли, и живущии на ней аки прузи: поставивый небо яко камару и простер е, яко скинию обитати:

²³ даяй князи аки ничтоже владети, и землю аки ничтоже сотвори.

²⁴ Не насадят бо, ниже насеют, и не вкоренится в земли корение их: дхну на них ветр, и изсхоша, и буря аки стеблие возмет их.

²⁵ Ныне убо кому Мя уподобисте, и вознесуся? Рече Святый.

²⁶ Воззрите на высоту очима вашима и видите, кто сотвори сия вся: носяй по числу утварь Свою, и вся по имени прозовет от многия славы и в державе крепости Своея: ничтоже утаися и Тебе.

²⁷ Еда бо речеши, Иакове, и что глаголал еси, Израилю: утаися путь мой от Бога, и Бог мой суд отя, и отступи?

²⁸ И ныне не уразумел ли еси ни ли слышал еси? Бог вечный, Бог устроивый концы земли, не взалчет, ниже утрудится, ниже есть изобретение премудрости Его,

²⁹ даяй алчущым крепость и неболезненным печаль.

³⁰ Взалчут бо юнейшии, и утрудятся юноты, и избраннии не крепцы будут:

³¹ терпящии же Господа изменят крепость, окрылатеют аки орли, потекут и не утрудятся, пойдут и не взалчут.