¹ Отвещав же Елиус, рече:

² послушайте мене, премудрии: сведущии, внушите (доброе),

³ яко ухо словеса искушает, гортань же вкушает брашна.

⁴ Суд изберем себе, уразумеем посреде себе, что лучшее.

⁵ Яко рече Иов: праведен есмь, Господь отят ми суд,

⁶ солга же суду моему: насильна стрела моя без неправды.

⁷ Кто муж, якоже Иов, пияй поругание, якоже воду,

⁸ не согрешая, ниже нечествовав, ниже приобщився к творящым беззакония, еже ходити с нечестивыми?

⁹ Не рцы бо, яко несть посещения мужеви, и посещения ему от Господа.

¹⁰ Темже, разумивии сердцем, послушайте мене, не буди ми пред Господем нечествовати и пред Вседержителем возмутити правду:

¹¹ но воздает человекови, якоже творит кийждо их, и на стези мужестей обрящет и.

¹² Мниши же Господа нелепая сотворити, или Вседержитель смятет суд, иже сотвори землю?

¹³ Кто же есть творяй поднебесную и яже в ней всяческая?

¹⁴ Аще бо восхощет запретити и дух у Себе удержати,

¹⁵ умрет всяка плоть вкупе, всяк же человек в землю пойдет, отнюдуже и создан бысть.

¹⁶ Аще же не увещаешися, послушай сих, внуши глас глагол.

¹⁷ Виждь ты ненавидящаго беззаконная и губящаго лукавыя, суща, вечна, праведна.

¹⁸ Нечестив есть глаголяй цареви, закон преступаеши, нечестивейше, князем:

¹⁹ иже не постыдеся лица честнаго, ниже весть честь возложити сильным, удивитися лицам их.

²⁰ Тще же им сбудется, еже возопити и молити мужа: зане употребиша беззаконно, безчестяще немощных.

²¹ Той бо зритель есть дел человеческих, утаися же от Него ничтоже от тех, яже творят:

²² ниже будет место укрытися творящым беззаконная:

²³ яко не на мужа положит еще.

²⁴ Господь бо всех видит, постизаяй неизследная, славная же и изрядная, имже несть числа,

²⁵ сведый их дела, и обратит нощь, и смирятся.

²⁶ Угаси же нечестивыя, видими же пред ним:

²⁷ яко уклонишася от закона Божия, оправданий же Его не познаша,

²⁸ еже вознести к Нему вопль нищих, и вопль убогих услышит.

²⁹ И Той тишину подаст, и кто осудит? И сокрыет лице, и кто узрит Его? И на язык, и на человека вкупе,

³⁰ иже поставляет царем человека лицемера за строптивость людий.

³¹ Яко к Крепкому глаголяй: взях, не отиму вместо залога:

³² без мене узрю, Ты покажи ми: аще неправду соделах, не имам приложити.

³³ Еда от тебе истяжет ю, яко ты отринеши, яко ты избереши, а не аз ли? И что разумееши? Глаголи.

³⁴ Темже смысленнии сердцем рекут сия, муж же премудр услыша глагол мой.

³⁵ Иов же не в разуме глаголаше, словеса же его не в хитрости.

³⁶ Обаче навыкни, Иове, не даждь еще ответа, якоже немудрии:

³⁷ да не приложим на грехи нашя: беззаконие же на нас вменится, многая глаголющих словеса на Господа.