¹ ¶ Na Ehap i tokim Jesebel long olgeta samting Ilaija i bin mekim, na wantaim dispela olgeta long em i bin kilim i dai olgeta profet wantaim bainat olsem wanem.

² Nau Jesebel i salim wanpela mausman long Ilaija, i spik, Olsem tasol ol god i ken mekim long mi, na moa tu, sapos mi no mekim laip bilong yu kamap olsem laip bilong wanpela bilong ol bipo long tumora klostu olsem dispela taim.

³ Na taim em i lukim dispela, em i kirap, na go bilong lukautim laip bilong em, na em i kamap long Biar-siba, dispela i bilong Juda, na lusim wokboi bilong em long dispela hap.

⁴ Tasol em yet i go wanpela wan de wokabaut insait long ples i no gat man, na kam na sindaun aninit long wanpela diwai junipa. Na em i askim bilong em yet long em i ken dai. Na em i tok, Em inap. Nau, O BIKPELA, tekewe laip bilong mi. Long wanem, mi no winim ol tumbuna papa bilong mi.

⁵ Na taim em i slip na slip i dai aninit long wanpela diwai junipa, lukim, nau wanpela ensel i tasim em, na tokim em, Kirap na kaikai.

⁶ Na em i lukluk, na, lukim, i gat wanpela kek i kuk pinis antap long ol sakol, na wanpela jak wara klostu long het bilong em. Na em i bin kaikai na dring, na slipim em yet gen.

⁷ Na ensel bilong BIKPELA i kam gen namba tu taim, na tasim em, na tok, Kirap na kaikai. Bilong wanem, dispela wokabaut em i bikpela tumas long yu.

⁸ Na em i kirap, na em i bin kaikai na dring, na go long strong bilong dispela kaikai 40 de na 40 nait i go long Horep, maunten bilong God.

⁹ ¶ Na em i kam long dispela hap long wanpela hul i go insait long maunten, na slip long dispela hap. Na, lukim, tok bilong BIKPELA i kam long em, na Em i tokim em, Yu mekim wanem long hia, Ilaija?

¹⁰ Na em i tok, Mi bin jeles tru bilong tingim God BIKPELA bilong ol ami. Long wanem, ol pikinini bilong Isrel i bin givim baksait long kontrak bilong Yu, ol i tromoi i go daun ol alta bilong Yu, na kilim i dai ol profet bilong Yu wantaim bainat. Na mi, yes, mi wanpela tasol, i stap yet. Na ol i painim laip bilong mi, long tekewe dispela.

¹¹ Na Em i tok, Go ausait, na sanap antap long maunten long ai bilong BIKPELA. Na, lukim, BIKPELA i wokabaut klostu long em, na wanpela bikpela na strongpela win i brukim ol maunten, na brukim long ol planti hap hap ol ston long ai bilong BIKPELA. Tasol BIKPELA i no stap insait long dispela win. Na bihain long win wanpela guria i kamap. Tasol BIKPELA i no stap insait long dispela guria.

¹² Na bihain long guria wanpela paia, tasol BIKPELA i no stap insait long dispela paia. Na bihain long paia wanpela liklik nek i stap isi.

¹³ Na em i stap olsem, taim Ilaija i harim dispela, long em i karamapim pes bilong em long saket bilong em, na go ausait, na sanap long maus bilong hul i go insait long maunten. Na, lukim, i gat wanpela nek i kam long em, na tok, Yu mekim wanem long hia, Ilaija?

¹⁴ Na em i tok, Mi bin jeles tru bilong tingim God BIKPELA bilong ol ami. Bilong wanem, ol pikinini bilong Isrel i bin givim baksait long kontrak bilong Yu, ol i tromoi i go daun ol alta bilong Yu, na kilim i dai ol profet bilong Yu wantaim bainat. Na mi, yes, mi wanpela tasol, i stap yet. Na ol i painim laip bilong mi, long tekewe dispela.

¹⁵ Na BIKPELA i tokim em, Go, go bek long rot bilong yu long ples i no gat man Damaskas. Na taim yu kamap, makim Hasel wantaim wel long stap king long bosim Siria.

¹⁶ Na Jehu, pikinini man bilong Nimsi, bai yu makim wantaim wel long stap king long bosim Isrel. Na Ilaisa, pikinini man bilong Safat bilong Ebel-mehola, bai yu makim wantaim wel long stap profet long kisim ples bilong yu.

¹⁷ Na em bai kamap olsem, long em husat i ranawe long bainat bilong Hasel, Jehu bai kilim i dai. Na em husat i ranawe long bainat bilong Jehu, Ilaisa bai kilim i dai.

¹⁸ Yet Mi lusim bilong Mi 7,000 man long Isrel, olgeta skru bilong lek bilong husat i no bin lindaun long Beal, na olgeta wan wan maus bilong husat i no bin givim kis long em.

¹⁹ ¶ Olsem na em i go lusim dispela ples, na lukim Ilaisa, pikinini man bilong Safat, husat i wok long brukim graun wantaim twelpela yok bilong bulmakau man i go pas long em, na em i stap wantaim namba twelv. Na Ilaija i wokabaut klostu long em, na tromoi saket bilong em antap long em.

²⁰ Na em i lusim ol bulmakau man, na ran bihain long Ilaija, na tok, Larim mi, mi askim yu plis, givim kis long papa bilong mi na mama bilong mi, na nau mi bai bihainim yu. Na em i tokim em, Go bek gen. Long wanem, mi bin mekim wanem long yu?

²¹ Na em i go bek na lusim em, na kisim wanpela yok bilong ol bulmakau man, na kilim tupela i dai, na boilim mit bilong ol wantaim ol samting bilong mekim ol bulmakau man long wok, na givim abus long ol manmeri, na ol i bin kaikai. Nau em i kirap, na go bihainim Ilaija, na wokim wok long em.