¹ וידבר יהוה אל משה ואל אהרן לאמר אליהם

² דברו אל בני ישראל לאמר זאת החיה אשר תאכלו מכל הבהמה אשר על הארץ

³ כל מפריסת פרסה ושסעת שסע שתי פרסות מעלת גרה בבהמה אתה תאכלו

⁴ אך את זה לא תאכלו ממעלי הגרה וממפרסי הפרסה את הגמל כי מעלה גרה הוא ופרסה איננו מפריס טמא הוא לכם

⁵ ואת השפן כי מעלה גרה הוא ופרסה לא הפריס טמא הוא לכם

⁶ ואת הארנבת כי מעלת גרה היא ופרסה לא הפריסה טמאה היא לכם

⁷ ואת החזיר כי מפריס פרסה הוא ושסע שסע פרסה והוא גרה לא יגור טמא הוא לכם

⁸ מבשרם לא תאכלו ובנבלתם לא תגעו טמאים הם לכם

⁹ ואת זה תאכלו מכל אשר במים כל אשר לו סנפיר וקשקשת במים בימים ובנחלים אתם תאכלו

¹⁰ וכל אשר אין לו סנפיר וקשקשת במים בימים ובנחלים מכל שרץ המים ומכל נפש החיה אשר במים שקץ הם לכם

¹¹ ושקץ יהיו לכם מבשרם לא תאכלו ואת נבלתם תשקצו

¹² וכל אשר אין לו סנפיר וקשקשת במים שקץ הוא לכם

¹³ ואת אלה תשקצו מן העוף לא תאכלו שקץ הם את הנשר ואת הפרס ואת העזניה

¹⁴ ואת הדאה ואת האיה למינה

¹⁵ ואת כל ערב למינו

¹⁶ ואת בת היענה ואת התחמס ואת השחף למינו ואת הנץ

¹⁷ ואת הכוס ואת השלך ואת הינשוף

¹⁸ ואת התנשמת ואת הקאת ואת הרחמה

¹⁹ ואת החסידה והאנפה למינה ואת הדגיפת ואת העטלף

²⁰ וכל שרץ העוף ההלך על ארבע שקץ הוא לכם

²¹ אך את זה תאכלו מכל שרץ העוף ההלך על ארבע אשר לא כרעים ממעל לרגליו לנתר בהם על הארץ

²² את אלה מהם תאכלו את הארבה למינהו ואת הסלעם למינהו ואת החרגל למינה ואת החגב למינהו

²³ וכל שרץ העוף אשר לו ארבע רגלים שקץ הוא לכם

²⁴ ולאלה תטמאו כל הנגע בנבלתם יטמא עד הערב

²⁵ וכל הנשא מנבלתם יכבס בגדיו ורחץ במים וטמא עד הערב

²⁶ לכל הבהמה אשר היא מפריסת פרסה ושסעה איננה שסע . וגרה איננה מעלה טמאים הם לכם כל הנגע בהם יטמא

²⁷ וכל ההלך על כפיו בכל החיה ההלכת על ארבע טמאים הם לכם כל הנגע בנבלתם יטמא עד הערב

²⁸ והנשא . מנבלתם יכבס בגדיו וטמא עד הערב טמאים הם לכם

²⁹ וזה לכם הטמא בשרץ השרץ על הארץ החלד והעכבור והצב למינו

³⁰ והאנקה והכח והלטאה והחמט והתנשמת

³¹ אלה הטמאים לכם מכל השרץ כל הנגע בהם במותם יטמא עד הערב

³² וכל אשר יפל עליו מהם במותם יטמא מכל כלי עץ או בגד או עור או שק כל כלי אשר יעשה מלאכה בהם במים יבוא וטמא עד הערב וטהר

³³ וכל כלי חרש אשר יפל מהם אל תוכו כל אשר בתוכו יטמא ואתו תשברו

³⁴ מכל האכל אשר יאכל אשר יבוא עליו מים יטמא וכל משקה אשר ישתה בכל כלי יטמא

³⁵ וכל אשר יפל מנבלתם עליו יטמא תנור וכרים יתצו טמאים הם וטמאים יהיו לכם

³⁶ אך מעין מים ובור מקוה מים יהיה טהור ונגע בנבלתם יטמא

³⁷ וכי יפל מנבלתם על . זרע זרע אשר יזרע טהור הוא

³⁸ וכי יתן מים על הזרע ונפל מנבלתם עליו טמא הוא לכם

³⁹ וכי ימות מן הבהמה אשר היא לכם לאכלה הנגע בנבלתה יטמא עד הערב

⁴⁰ והאכל מנבלתה יכבס בגדיו וטמא עד הערב והנשא את נבלתה יכבס בגדיו וטמא עד הערב

⁴¹ וכל השרץ השרץ על הארץ שקץ הוא לא יאכל

⁴² כל ההלך על גחון וכל ההלך על ארבע עד כל מרבה רגלים לכל השרץ השרץ על הארץ לא תאכלום כי שקץ הם

⁴³ אל תשקצו את נפשתיכם בכל השרץ השרץ ולא תטמאו בהם ונטמאתם בם

⁴⁴ כי אני יהוה אלהיכם והתקדשתם והייתם קדשים כי קדוש אני ולא תטמאו את נפשתיכם בכל השרץ הרמש על הארץ

⁴⁵ כי אני יהוה אלהיכם המעלה אתכם מארץ מצרים להיות לכם לאלהים והייתם קדשים כי קדוש אני

⁴⁶ זאת תורת הבהמה והעוף וכל נפש החיה הרמשת במים לכל הנפש השרצת על הארץ

⁴⁷ להבדיל בין הטמא ובין הטהור ובין החיה הנאכלת ובין החיה אשר לא תאכל