¹ ¶ Bihain long en em i bringim mi long tempel, na mitaim ol pos, brait i sikispela kyubit long wanpela sait, na brait i sikispela kyubit long arapela sait, dispela i brait bilong haus holi.

² Na brait bilong dua i tenpela kyubit. Na ol sait bilong dua i faipela kyubit long wanpela sait, na faipela kyubit long arapela sait. Na em i mitaim longpela bilong en, 40 kyubit, na brait, 20 kyubit.

³ Nau em i go insait, na mitaim pos bilong dua, tupela kyubit, na dua, sikispela kyubit, na brait bilong dua, sevenpela kyubit.

⁴ Olsem na em i mitaim longpela bilong en, 20 kyubit, na brait bilong en, 20 kyubit, long ai bilong tempel. Na em i tokim mi, Dispela em i ples i holi moa olgeta.

⁵ Bihain em i mitaim banis bilong haus, sikispela kyubit, na brait bilong olgeta wan wan rum i stap long sait, fopela kyubit, raun nabaut long haus long olgeta wan wan sait.

⁶ Na ol rum bilong sait i tripela, wanpela antap long narapela, na 30 i lain. Na ol i go insait long dispela banis i bilong haus bilong ol rum i stap long sait raun nabaut, inap long ol i ken i gat ples bilong pasim, tasol ol i no gat ples bilong pasim long banis bilong haus.

⁷ Na i gat wanpela spes i wok long go traipela, na wanpela tanim nabaut i go antap i go long ol rum bilong sait. Long wanem, tanim nabaut bilong dispela haus i wok long go antap yet raun nabaut long haus. Olsem na brait bilong haus i go antap yet, na i kamap bikpela moa olsem, i stat long rum i daunbilo olgeta i go long rum i antap moa olgeta long namel bilong en.

⁸ Mi lukim tu longpela antap bilong haus raun nabaut. Ol as ston bilong ol rum bilong sait i wanpela tiktik olgeta bilong sikispela bikpela kyubit.

⁹ Patpela bilong banis, dispela i bilong rum bilong sait i stap ausait, i faipela kyubit. Na dispela samting i stap yet em i ples bilong ol dispela rum bilong sait i stap insait.

¹⁰ Na namel long ol rum i gat spes i gat brait i 20 kyubit raun nabaut long haus long olgeta wan wan sait.

¹¹ Na ol dua bilong ol rum bilong sait i lukluk i go long dispela ples i stap yet, wanpela dua i go long hap not, na narapela dua i go long hap saut. Na brait bilong dispela ples i stap yet i faipela kyubit raun nabaut.

¹² ¶ Nau dispela haus i stap long ai bilong ples dispela i stap em yet long hap arere i go long hap wes i gat brait i 70 kyubit. Na patpela bilong banis bilong haus i faipela kyubit raun nabaut, na longpela bilong en i 90 kyubit.

¹³ Olsem na em i mitaim dispela haus, longpela i 100 kyubit. Na ples i stap em yet, na haus, wantaim ol banis bilong en, longpela i 100 kyubit.

¹⁴ Na tu brait bilong pes bilong haus, na bilong ples i stap em yet i go long hap is, 100 kyubit.

¹⁵ Na em i mitaim longpela bilong haus i pas klostu long dispela ples i stap em yet i stap baksait long en, na ol ples win bilong en long wanpela sait na long arapela sait, 100 kyubit, wantaim tempel insait, na ol veranda bilong ples op,

¹⁶ Ol pos bilong dua, na ol windo i no patpela, na ol ples win raun nabaut long tripela stori bilong ol i go pas klostu long dua, ol i banisim antap bilong rum wantaim diwai raun nabaut, na long graun i go antap long ol windo, na ol windo ol i karamapim,

¹⁷ I go inap long hap i antap long dua, yes, i go inap long haus insait, na ausait, na klostu long banis raun nabaut olgeta insait na ausait, long skel bilong en.

¹⁸ Na ol i wokim dispela wantaim ol serupim na ol diwai palmen, inap long wanpela diwai palmen i stap namel long wanpela serup na wanpela serup. Na olgeta wan wan serup i gat tupela pes,

¹⁹ Inap long pes bilong wanpela man i go long diwai palmen long wanpela sait, na pes bilong wanpela yangpela laion i go long diwai palmen long arapela sait. Ol i wokim dispela long olgeta hap bilong haus raun nabaut.

²⁰ Long graun i go inap long antap bilong dua ol i wokim ol serupim na ol diwai palmen, na antap long banis bilong tempel.

²¹ Ol pos bilong tempel ol i mekim skwea, na pes bilong rum holi. Lukluk bilong wanpela i olsem lukluk bilong arapela.

²² Alta diwai i tripela kyubit antap, na longpela bilong en i tupela kyubit. Na ol kona bilong en, na longpela bilong en, na ol banis bilong en, i diwai. Na em i tokim mi, Dispela em i dispela tebol i stap long ai bilong BIKPELA.

²³ Na tempel na rum holi i gat tupela dua.

²⁴ Na ol dua i gat tupela lip wan wan, tupela lip i tanim, tupela lip bilong wanpela dua, na tupela lip bilong arapela dua.

²⁵ Na ol i wokim antap long ol, antap long ol dua bilong tempel, ol serupim na ol diwai palmen, wankain olsem ol i wokim antap long ol banis. Na i gat ol patpela plang antap long pes bilong veranda ausait.

²⁶ Na i gat ol windo i no patpela na ol diwai palmen long wanpela sait na long arapela sait, long ol sait bilong veranda, na antap long ol rum long sait bilong haus, na ol patpela plang.