¹ ¶ Long namba 25 yia bilong kalabus bilong mipela, long stat bilong yia, long namba ten de bilong mun, long namba 14 yia bihain long ol i paitim dispela biktaun, long dispela de stret han bilong BIKPELA i stap antap long mi, na bringim mi long dispela hap.

² Long ol driman samting bilong God Em i bringim mi insait long hap bilong Isrel, na putim mi antap long wanpela maunten i antap tru, klostu long dispela em i samting i olsem bun bilong wanpela biktaun long hap saut.

³ Na Em i bringim mi long dispela hap, na, lukim, wanpela man i stap, husat i luk olsem lukluk bilong bras, wantaim wanpela rop flaks long han bilong em, na wanpela tiktik bilong mitaim samting. Na em i sanap long dua bilong banis.

⁴ Na dispela man i tokim mi, Pikinini man bilong man, lukim wantaim tupela ai bilong yu, na harim wantaim tupela ia bilong yu, na putim bel bilong yu antap long olgeta samting mi bai soim yu. Long wanem, long dispela as, long mi ken soim ol long yu, mi bin bringim yu long hia. Tokaut long hauslain bilong Isrel long olgeta samting yu lukim.

⁵ ¶ Na lukim wanpela banis i stap ausait long haus raun nabaut, na long han bilong dispela man i gat wanpela tiktik bilong mitaim samting i longpela olsem sikispela kyubit, long dispela kyubit na wanpela brait bilong han bilong man. Olsem na em i mitaim brait bilong haus, wanpela tiktik. Na antap bilong en, wanpela tiktik.

⁶ Nau em i kam long dispela dua bilong banis i lukluk i go long hap is, na em i go antap long lata bilong en, na mitaim as bilong dua bilong banis, brait i wanpela tiktik. Na arapela as bilong dua bilong dua bilong banis, brait i wanpela tiktik.

⁷ Na olgeta wan wan liklik rum em i longpela olsem wanpela tiktik, na brait i wanpela tiktik. Na namel long ol liklik rum i gat faipela kyubit. Na brait bilong as bilong dua bilong banis klostu long veranda bilong dua bilong banis insait em i wanpela tiktik.

⁸ Em i mitaim tu veranda bilong dua bilong banis insait, wanpela tiktik.

⁹ Nau em i mitaim veranda bilong dua bilong banis, etpela kyubit, na ol pos bilong en, tupela kyubit. Na veranda bilong dua bilong banis i kam insait.

¹⁰ Na ol liklik rum bilong dua bilong banis i go long hap is i tripela long dispela sait, na tripela long hapsait. Dispela tripela i wanpela skel tasol. Na ol pos i gat wanpela skel long dispela sait na long hapsait.

¹¹ Na em i mitaim brait bilong ples bilong kam insait bilong dua bilong banis, tenpela kyubit. Na longpela bilong dua bilong banis, 13 kyubit.

¹² Spes tu i stap long ai bilong ol liklik rum i wanpela kyubit long dispela sait, na spes i wanpela kyubit long hapsait. Na ol liklik rum i sikispela kyubit long dispela sait, na sikispela kyubit long hapsait.

¹³ Nau em i mitaim dua bilong banis i stat long rup bilong wanpela liklik rum i go long rup bilong narapela. Brait i 25 kyubit, dua i pas klostu long dua.

¹⁴ Em i wokim tu ol pos i 60 kyubit, yes, i go inap long pos bilong ples op raun nabaut long dua bilong banis.

¹⁵ Na i stat long pes bilong dua bilong banis bilong ples bilong kam insait i go long pes bilong veranda bilong insait dua bilong banis i 50 kyubit.

¹⁶ Na i gat ol windo i no patpela i stap long ol liklik rum, na long ol pos bilong ol insait long dua bilong banis raun nabaut, na wankain olsem long ol bogen. Na ol windo i stap raun nabaut insait. Na antap long olgeta wan wan pos i gat ol diwai palmen.

¹⁷ Nau em i bringim mi insait long ples op ausait, na, harim, ol rum i stap, na wanpela plua ston samting ol i wokim bilong ples op raun nabaut. 30 rum i stap antap long dispela plua ston samting.

¹⁸ Na dispela plua ston samting i klostu long ol dua bilong banis i pas klostu long longpela bilong ol dua bilong banis em i dispela plua ston samting daunbilo.

¹⁹ Nau em i mitaim brait bilong fran hap bilong dua bilong banis daunbilo i go inap long fran hap bilong dua bilong banis bilong ples op insait i stap ausait, 100 kyubit i go long hap is na hap not.

²⁰ Na dua bilong banis bilong dispela ples op ausait i lukluk i go long hap not, em i mitaim longpela bilong en, na brait bilong en.

²¹ Na ol liklik rum bilong en i tripela long dispela sait na tripela long hapsait. Na ol pos bilong en na ol bogen bilong en i bihainim skel bilong namba wan dua bilong banis. Longpela bilong en i 50 kyubit, na brait bilong en i 25 kyubit.

²² Na ol windo bilong ol, na ol bogen bilong ol, na ol diwai palmen bilong ol, i bihainim skel bilong dispela dua bilong banis i lukluk i go long hap is. Na ol i go antap long en long sevenpela step. Na ol bogen bilong en i stap long ai bilong ol.

²³ Na dua bilong banis bilong ples op insait i go pas klostu long dua bilong banis i go long hap not, na i go long hap is. Na em i mitaim long dua bilong banis i go long dua bilong banis 100 kyubit.

²⁴ Bihain long dispela em i bringim mi i go long hap saut, na lukim, wanpela dua bilong banis i go long hap saut. Na em i mitaim ol pos bilong en na ol bogen bilong en bilong bihainim ol dispela skel.

²⁵ Na i gat ol windo insait long en, na insait long ol bogen bilong en raun nabaut, olsem ol dispela windo. Longpela bilong en i 50 kyubit, na brait bilong en i 25 kyubit.

²⁶ Na i gat sevenpela step long go antap long en, na ol bogen bilong en i stap long ai bilong ol. Na em i gat ol diwai palmen, wanpela long dispela sait, na narapela long hapsait, antap long ol pos bilong en.

²⁷ ¶ Na i gat wanpela dua bilong banis long ples op insait i go long hap saut. Na em i mitaim long dua bilong banis i go long dua bilong banis i go long hap saut 100 kyubit.

²⁸ Na em i bringim mi long ples op insait i klostu long dua bilong banis saut. Na em i mitaim dua bilong banis saut bilong bihainim ol dispela skel,

²⁹ Na ol liklik rum bilong en, na ol pos bilong en, na ol bogen bilong en, bilong bihainim ol dispela skel. Na i gat ol windo insait long en na insait long ol bogen bilong en raun nabaut. Longpela i 50 kyubit, na brait i 25 kyubit.

³⁰ Na longpela bilong ol bogen raun nabaut i 25 kyubit, na brait i faipela kyubit.

³¹ Na ol bogen bilong en i go long ples op ausait tru. Na ol diwai palmen i stap antap long ol pos bilong en. Na long go antap long en i gat etpela step.

³² Na em i bringim mi insait long ples op insait i go long hap is. Na em i mitaim dua bilong banis bilong bihainim ol dispela skel.

³³ Na ol liklik rum bilong en, na ol pos bilong en, na ol bogen bilong en, ol i bilong bihainim ol dispela skel. Na i gat ol windo i stap long en na insait long ol bogen bilong en raun nabaut. Longpela i 50 kyubit, na brait i 25 kyubit.

³⁴ Na ol bogen bilong en i go long ples op ausait. Na ol diwai palmen bilong en i stap antap long ol pos bilong en, long dispela sait, na long hapsait. Na long go antap long en i gat etpela step.

³⁵ Na em i bringim mi long dua bilong banis not, na em i mitaim dispela bilong bihainim ol dispela skel,

³⁶ Ol liklik rum bilong en, ol pos bilong en, na ol bogen bilong en, na ol windo bilong en raun nabaut. Longpela bilong en i 50 kyubit, na brait bilong en i 25 kyubit.

³⁷ Na ol pos bilong en i go long ples op ausait tru. Na ol diwai palmen i stap antap long ol pos bilong en, long dispela sait, na long hapsait. Na long go antap long en i gat etpela step.

³⁸ Na ol rum na ol ples bilong go insait long en i stap klostu long ol pos bilong ol dua bilong banis, we ol i wasim ofa i kuk olgeta.

³⁹ ¶ Na long veranda bilong dua bilong banis tupela tebol i stap long dispela sait, na tupela tebol i stap long hapsait, bilong kilim i dai ofa i kuk olgeta na ofa bilong sin na ofa bilong sakim lo antap long ol.

⁴⁰ Na long sait ausait, taim wanpela i go antap long ples bilong go insait long dua bilong banis not, tupela tebol i stap. Na long arapela sait, dispela i stap long veranda bilong dua bilong banis, tupela tebol i stap.

⁴¹ Fopela tebol i stap long dispela sait, na fopela tebol long hapsait, klostu long sait bilong dua bilong banis, etpela tebol, we ol i kilim i dai ol sakrifais bilong ol antap long ol.

⁴² Na fopela tebol ol i wokim long ston ol i katim, bilong ofa i kuk olgeta, longpela i 1.5 kyubit, na brait i 1.5 kyubit, na antap bilong ol i wanpela kyubit, we antap long ol tu ol i putim ol naip samting we ol i kilim i dai ofa i kuk olgeta na sakrifais wantaim ol.