¹ ¶ Na ol man bilong Kiriat-jerim i kam, na kisim bokis kontrak bilong BIKPELA, na bringim dispela insait long haus bilong Abinadap long liklik maunten, na mekim pikinini man bilong em Eliesar i kamap holi long lukautim bokis kontrak bilong BIKPELA.

² Na em i kamap olsem, taim bokis kontrak i stap long Kiriat-jerim, long taim i go longpela. Long wanem, em i 20 yia. Na olgeta hauslain bilong Isrel i krai sori bihain long BIKPELA.

³ ¶ Na Samyuel i tokim olgeta hauslain bilong Isrel, i spik, Sapos i tru yupela i tanim i kam bek long BIKPELA wantaim olgeta bel bilong yupela, orait rausim i go ol narakain god na Astarot long namel long yupela, na redim ol bel bilong yupela i go long BIKPELA, na bihainim Em wanpela tasol. Na Em bai kisim bek yupela ausait long han bilong ol Filistin.

⁴ Nau ol pikinini bilong Isrel i bin rausim i go Bealim na Astarot, na bihainim BIKPELA tasol.

⁵ Na Samyuel i tok, Bungim olgeta Isrel long Mispa, na mi bai beten long yupela i go long BIKPELA.

⁶ Na ol i bung wantaim long Mispa, na pulimapim wara, na kapsaitim dispela i go long ai bilong BIKPELA, na tambuim kaikai long dispela de, na tok long hap, Mipela i bin mekim sin i birua long BIKPELA. Na Samyuel i jasim ol pikinini bilong Isrel long Mispa.

⁷ ¶ Na taim ol Filistin i harim long ol pikinini bilong Isrel i bung wantaim long Mispa, ol bikman bilong ol Filistin i go antap bilong birua long Isrel. Na taim ol pikinini bilong Isrel i harim dispela, ol i pret long ol Filistin.

⁸ Na ol pikinini bilong Isrel i tokim Samyuel, No ken lusim pasin bilong krai long BIKPELA, God bilong mipela, bilong helpim mipela, long Em bai kisim bek mipela ausait long han bilong ol Filistin.

⁹ Na Samyuel i kisim wanpela susu pikinini sipsip, na ofaim dispela bilong wanpela ofa i kuk olgeta i go long BIKPELA wanpela tasol. Na Samyuel i krai long BIKPELA bilong helpim Isrel. Na BIKPELA i harim em.

¹⁰ Na taim Samyuel i ofaim ofa i kuk olgeta i go antap, ol Filistin i wok long kam klostu long pait birua long Isrel. Tasol BIKPELA i pairap wantaim wanpela bikpela pairap long dispela de antap long ol Filistin, na bagarapim ol olgeta. Na BIKPELA i paitim ol long ai bilong Isrel.

¹¹ Na ol man bilong Isrel i go ausait long Mispa, na ran bihainim ol Filistin, na paitim ol, inap long ol i kam aninit long Bet-ka.

¹² Nau Samyuel i kisim wanpela ston, na sanapim dispela namel long Mispa na Sen, na kolim nem bilong en Ebenisar, i spik, Inap long hia, BIKPELA i bin helpim yumi.

¹³ ¶ Olsem tasol ol Filistin i stap aninit, na ol i no kam moa insait long hap arere bilong Isrel. Na han bilong BIKPELA i birua long ol Filistin olgeta de bilong Samyuel.

¹⁴ Na ol dispela biktaun ol Filistin i bin kisim long Isrel, Bikpela givim i go bek long Isrel, i stat long Ekron, yes, i go inap long Gat. Na ol hap arere bilong ol Isrel i bin kisim bek ausait long ol han bilong ol Filistin. Na i gat bel isi namel long Isrel na ol lain Amor.

¹⁵ Na Samyuel i jasim Isrel olgeta de bilong laip bilong em.

¹⁶ Na em i save go long olgeta wan wan yia long raun long Betel, na Gilgal, na Mispa, na jasim Isrel long olgeta dispela ples.

¹⁷ Na ples em i kam bek long en em Rama. Long wanem, haus bilong em i stap long dispela hap. Na long dispela hap em i jasim Isrel. Na long dispela hap em i wokim wanpela alta i go long BIKPELA.