¹ ¶ Na Sol i tokim pikinini man bilong em Jonatan, na olgeta wokboi bilong em, long ol i mas kilim Devit.

² Tasol pikinini man bilong Sol Jonatan i gat planti gutpela amamas long Devit. Na Jonatan i tokim Devit, i spik, Papa bilong mi Sol i painim rot long kilim yu. Olsem na nau, mi askim yu plis, lukaut gut long yu yet inap long moning, na stap long ples hait, na haitim yu yet.

³ Na mi bai go ausait na sanap klostu long papa bilong mi long ples kunai we yu stap, na mi bai stori wantaim papa bilong mi long yu. Na wanem samting mi lukim, dispela mi bai tokim yu.

⁴ Na Jonatan i toktok gut long sait bilong Devit long papa bilong em, na tokim em, No ken larim king i mekim sin i birua long wokboi bilong em, i birua long Devit. Bilong wanem, em i no bin mekim sin i birua long yu, na bilong wanem, ol wok bilong em i bin gutpela tru i go long yu.

⁵ Long wanem, em i bin putim laip bilong em long han bilong em, na kilim i dai dispela Filistin, na BIKPELA i wokim bikpela kisim bek bilong helpim olgeta Isrel. Yu lukim dispela, na yu bin wokim amamas tru. Olsem wanem na nau yu laik mekim sin i birua long blut i no bin mekim rong, na long kilim Devit i dai taim i no gat as bilong en?

⁶ Na Sol i harim nek bilong Jonatan. Na Sol i wokim strongpela promis, Olsem BIKPELA i stap laip, mi bai i no inap kilim em i dai.

⁷ Na Jonatan i singautim Devit, na Jonatan i soim em olgeta dispela samting. Na Jonatan i bringim Devit i go long Sol, na em i stap long pes bilong em, olsem long ol taim bipo.

⁸ ¶ Na i gat bikpela pait gen. Na Devit i go ausait, na pait wantaim ol Filistin, na kilim ol i dai wantaim wanpela bikpela kilim i dai. Na ol i ranawe long em.

⁹ Na dispela spirit nogut i kam long BIKPELA i stap antap long Sol, taim em i sindaun long haus bilong em wantaim bikpela spia bilong em long han bilong em. Na Devit i pilai musik wantaim han bilong em.

¹⁰ Na Sol i painim rot long paitim Devit, yes, long banis wantaim dispela bikpela spia. Tasol em i lusim i go isi isi pes bilong Sol, na em i paitim bikpela spia long banis. Na Devit i ranawe, na ranawe olgeta long dispela nait.

¹¹ ¶ Sol tu i salim ol mausman long haus bilong Devit, long was long em, na long kilim em i dai long moning. Na Mikal, meri bilong Devit, i tokim em, i spik, Sapos yu no kisim bek laip bilong yu tude nait, tumora ol bai kilim yu i dai.

¹² Olsem na Mikal i lusim Devit i go daun ausait long wanpela windo. Na em i go, na ranawe, na i ranawe olgeta.

¹³ Na Mikal i kisim wanpela piksa god, na slipim dispela long bet, na putim pilo ol i wokim long gras bilong meme bilong stap pilo bilong em, na karamapim dispela wantaim wanpela laplap.

¹⁴ Na Taim Sol i salim ol mausman long kisim Devit, meri i tok, Em i sik.

¹⁵ Na Sol i salim ol mausman gen long lukim Devit, i spik, Bringim em long bet i kam antap long mi, inap long mi ken kilim em i dai.

¹⁶ Na taim ol mausman i kam insait, lukim, i gat wanpela piksa god i stap long bet, wantaim pilo ol i wokim long gras bilong meme bilong pilo bilong em.

¹⁷ Na Sol i tokim Mikal, Bilong wanem yu bin giamanim mi olsem, na salim birua bilong mi i go, inap long em i ranawe olgeta? Na Mikal i bekim tok long Sol, Em i tokim mi, Larim mi go, bilong wanem mi mas kilim yu?

¹⁸ ¶ Olsem na Devit i ranawe, na ranawe olgeta, na kamap long Samyuel long Rama, na tokim em long olgeta samting Sol i bin mekim long em. Na em na Samyuel i go na stap long Naiot.

¹⁹ Na ol i tokim Sol, i spik, Lukim, Devit i stap long Naiot long Rama.

²⁰ Na Sol i salim ol mausman long kisim Devit. Na taim ol i lukim ol lain bilong ol profet i wok long autim tok profet, na Samyuel i sanap olsem God i makim em long bosim ol, Spirit bilong God i stap antap long ol mausman bilong Sol, na ol tu i autim tok profet.

²¹ Na taim ol i tokim Sol long en, em i salim ol arapela mausman, na ol i autim tok profet wankain olsem. Na Sol i salim ol mausman gen long namba tri taim, na ol i autim tok profet tu.

²² Nau em i go tu long Rama, na kamap long dispela bikpela hul wara i stap long Seku. Na em i askim na tok, Samyuel tupela Devit i stap we? Na wanpela i tok, Lukim, ol i stap long Naiot long Rama.

²³ Na em i go long dispela hap long Naiot long Rama. Na Spirit bilong God i stap antap long em tu, na em i go yet, na autim tok profet, inap long em i kamap long Naiot long Rama.

²⁴ Na em i rausim olgeta klos bilong em tu, na autim tok profet long ai bilong Samyuel long wankain pasin, na slip skin nating olgeta hap bilong dispela de na olgeta hap bilong dispela nait. Olsem na ol i save tok, Sol tu i stap namel long ol profet?