¹ Kaj David eldiris antaŭ la Eternulo la vortojn de la sekvanta kanto, kiam la Eternulo lin savis el la manoj de ĉiuj liaj malamikoj kaj el la mano de Saul.

² Li diris: La Eternulo estas mia Roko, kaj mia fortikaĵo, kaj mia Savanto.

³ Dion, mian Rokon, mi fidas; Mia ŝildo, kaj la korno de mia savo, mia fortigo, kaj mia rifuĝejo; Mia Savanto, kiu helpas min kontraŭ maljusteco.

⁴ Mi vokas al la Eternulo, la glorinda; Kaj mi saviĝas de miaj malamikoj.

⁵ Ĉar ĉirkaŭis min la ondoj de la morto, Torentoj pereigaj min teruris;

⁶ La ŝnuroj de Ŝeol min ĉirkaŭis; La retoj de la morto min atingis.

⁷ En mia premiteco mi vokis la Eternulon, Kaj al mia Dio mi vokis; Kaj el Sia templo Li aŭdis mian voĉon, Kaj mia krio atingis Liajn orelojn.

⁸ Ektremis kaj ekskuiĝis la tero, La fundamentoj de la ĉielo ekmoviĝis Kaj ekŝanceliĝis, ĉar Li koleris.

⁹ Leviĝis fumo el Lia nazo, Kaj ekstermanta fajro el Lia buŝo; Karboj ekflamis de ĝi.

¹⁰ Li klinis la ĉielon kaj iris malsupren, Kaj densa mallumo estis sub Liaj piedoj.

¹¹ Kaj Li ekrajdis sur kerubo kaj ekflugis, Kaj Li portiĝis sur la flugiloj de la vento.

¹² Li ĉirkaŭigis Sin per mallumo kiel per tendo, Per densaj nuboj, plenaj de akvo.

¹³ De la brilo antaŭ Li Ekbrulis karboj per fajro.

¹⁴ El la ĉielo ektondris la Eternulo, Kaj la Plejaltulo aŭdigis Sian voĉon.

¹⁵ Li ĵetis sagojn, kaj dispelis ilin; fulmon, kaj konfuzis ilin.

¹⁶ Kaj malkovriĝis la kuŝujoj de la maro, Nudiĝis la fundamentoj de la universo, De la minaca voĉo de la Eternulo, De la kolera spirado de Lia nazo.

¹⁷ Li etendas el supre la brakon, kaj prenas min; Li eltiras min el grandaj akvoj;

¹⁸ Li savas min de mia potenca malamiko, De miaj malamantoj, ĉar ili estas pli fortaj ol mi.

¹⁹ Ili atingis min en la tago de mia malfeliĉo; Sed la Eternulo fariĝis mia subteno.

²⁰ Kaj Li elkondukis min en vastan lokon; Li liberigis min, ĉar Li estas favora al mi.

²¹ La Eternulo rekompencas min laŭ mia justeco; Laŭ la pureco de miaj manoj Li repagas al mi.

²² Ĉar mi min tenis je la vojoj de la Eternulo, Kaj mi ne faris malbonon antaŭ mia Dio.

²³ Ĉar ĉiuj Liaj leĝoj estis antaŭ mi, Kaj Liajn ordonojn mi ne forigis de mi.

²⁴ Mi estis senkulpa antaŭ Li, Kaj mi gardis min, ke mi ne peku.

²⁵ Kaj la Eternulo rekompencis min laŭ mia justeco, Laŭ mia pureco antaŭ Liaj okuloj.

²⁶ Kun favorkorulo Vi estas favorkora, Kun piulo Vi estas pia;

²⁷ Kun purulo Vi agas laŭ lia pureco, Kaj kun maliculo laŭ lia maliceco.

²⁸ Popolon humilan Vi helpas; Kaj per Viaj okuloj Vi malaltigas la fierulojn.

²⁹ Ĉar Vi estas mia lumilo, ho Eternulo; La Eternulo lumigas mian mallumon.

³⁰ Ĉar kun Vi mi forkurigas militistaron; Kun mia Dio mi transsaltas muron.

³¹ La vojo de Dio estas perfekta; La parolo de la Eternulo estas tute pura; Li estas ŝildo por ĉiuj, kiuj Lin fidas.

³² Ĉar kiu estas Dio, krom la Eternulo? Kaj kiu estas Roko, krom nia Dio?

³³ Dio fortikigas min per forto; Kaj Li perfektigas mian vojon.

³⁴ Li similigas miajn piedojn al cervaj, Kaj starigas min sur miaj altaĵoj.

³⁵ Li instruas mian manon militi, Kaj miajn brakojn streĉi kupran pafarkon.

³⁶ Vi donis al mi la ŝildon de Via savo; Kaj Via favoro min grandigas.

³⁷ Vi larĝigas mian paŝon sub mi, Por ke ne ŝanceliĝu miaj piedoj.

³⁸ Mi persekutas miajn malamikojn, kaj ekstermas ilin; Kaj mi ne revenas, ĝis mi ilin pereigas.

³⁹ Mi pereigas kaj frakasas ilin, ke ili ne povas plu leviĝi; Ili falas sub miajn piedojn.

⁴⁰ Vi ĉirkaŭzonas min per forto por la milito; Miajn atakintojn Vi ĵetas sub min.

⁴¹ Vi forkurigas de mi miajn malamikojn, Kaj miajn malamantojn mi ekstermas.

⁴² Ili rigardas ĉirkaŭen, sed ne venas helpanto; Al la Eternulo, sed Li ne respondas al ili.

⁴³ Mi disfrotas ilin simile al polvo de la tero; Kiel stratan koton mi ilin disbatas kaj dispremas.

⁴⁴ Vi savas min de la ribeloj de mia popolo; Vi gardas min, ke mi estu ĉefo super la nacioj; Popolo, kiun mi ne konas, servas min.

⁴⁵ Aligentuloj respektegas min; Ili obeas min per atentaj oreloj.

⁴⁶ Aligentuloj senfortiĝas, Kaj kuras terurite el siaj fortikaĵoj.

⁴⁷ Vivas la Eternulo; kaj benata estu mia Roko; Alte glorata estu mia Dio, la Roko de mia savo:

⁴⁸ Tiu Dio, kiu donas al mi venĝon Kaj submetas al mi popolojn;

⁴⁹ Kiu forkondukas min de miaj malamikoj, Altigas min super miaj atakintoj, Kaj savas min de perfortulo.

⁵⁰ Tial mi gloras Vin, ho Eternulo, inter la popoloj, Kaj pri Via nomo mi kantas.

⁵¹ Li donas grandan helpon al Sia reĝo, Kaj faras favoraĵon al Sia sanktoleito, Al David kaj al lia idaro, por eterne.