¹ For sjå Herren, Allhers-Herren, skal taka burt frå Jerusalem og Juda kvar studnad og stav, kvar studnad av mat, og kvar studnad av vatn,

² kjempa og stridsmann, domar og profet, spåmann og styresmann,

³ femtimanns-førar og vyrdingsmann, rådsherre og handverksmeister og trollkunnig mann.

⁴ Og eg skal gjeva deim unggutar til styrarar, og gutehått skal råda yver deim.

⁵ Og folket - den eine skal plåga den andre, kvar ein sin granne. Guten skal setja seg upp imot den gamle, fanten imot fagnamannen.

⁶ Når det då hender, at ein fær tak i ein annan i huset åt far hans, og segjer: «Du eig då ein klædnad, ver du styraren vår! Tak då rådvelde yver dette fallande riket!»

⁷ då skal han svara og segja: «Eg er ingen sårlækjar, i mitt hus er korkje brød eller klæde; gjer ikkje meg til styrar yver folket!»

⁸ For Jerusalem snåvar og Juda fell, av di dei i ord og gjerd stend Herren imot, og er tråssuge framfor hans herlegdoms åsyn.

⁹ Sjølve andlitssvipen deira vitnar imot deim, og liksom i Sodoma talar dei utan dulsmål um syndi si. Ve deira sjæl! For dei valdar seg sjølv ulukka.

¹⁰ Seg um den rettferdige at det skal ganga honom godt; frukti av si gjerning skal han njota.

¹¹ Men usæl den ugudlege! honom skal det ganga ille; hans eigne gjerningar hemnar seg på honom sjølv.

¹² Styraren yver mitt folk er eit barn, og kvinnor råder yver det. Mitt folk, førarane dine fører deg vilt, og gjer vegen du skal fara til villstig.

¹³ Herren hev stige fram, han vil føra sak, han stend og vil døma folki.

¹⁴ Herren held rettargang med sitt folks styresmenner og hovdingar: «De hev plundra vinhagen! Ran frå fatigmannen er i husi dykkar!

¹⁵ Korleis kann de soleis skamfara mitt folk og trakka dei fatige under fot?» segjer Herren, Allhers-Herren.

¹⁶ Og Herren segjer: «Av di Sions døtter briskar seg og gjeng med bratt nakke og spelar med augo, og gjeng og trippar og ringlar med fotringarne sine,

¹⁷ so skal Herren gjera kruna skurvut på Sions døtter, og Herren skal nækja deira blygsla.

¹⁸ På den dagen tek Herren frå deim all stasen deira: Fotringar, panneband, halssylgjor,

¹⁹ øyredobbor, armband, slør,

²⁰ hovudpryda, fotkjedor, belte, lukteflaskor, amulettar,

²¹ fingergull, naseringar,

²² høgtidsbunader, kåpor, kasteplagg, pungar,

²³ speglar, serkjer, huvor, flor.

²⁴ Og det skal verta illtev i staden for godange, reip i staden for belte, fleinskalle i staden for flettor, sekkjety i staden for høgtidstidsbunad og svidmerke i staden for vænleik.

²⁵ Mennerne dine skal falla for sverd og kjemporne dine i krig.

²⁶ Og portarne hennar skal gråta og låta, og einsleg sit ho att i gruset.»