¹ Haleluja! Gloru la Eternulon el la ĉielo, Gloru Lin en la alto.

² Gloru Lin, ĉiuj Liaj anĝeloj; Gloru Lin, ĉiuj Liaj militistaroj.

³ Gloru Lin, suno kaj luno; Gloru Lin, ĉiuj lumaj steloj.

⁴ Gloru Lin, plej supraj ĉieloj, Kaj la akvo, kiu estas super la ĉielo.

⁵ Ili gloru la nomon de la Eternulo; Ĉar Li ordonis, kaj ili kreiĝis.

⁶ Kaj Li starigis ilin por ĉiam, por eterne; Li donis leĝon, kiun ili ne malobeos.

⁷ Gloru la Eternulon el la tero, Marmonstroj kaj ĉiuj abismoj;

⁸ Fulmo kaj hajlo, neĝo kaj nebulo, Ventego, kiu plenumas Lian vorton;

⁹ Montoj kaj ĉiuj montetoj, Fruktoportaj arboj kaj ĉiuj cedroj;

¹⁰ Bestoj kaj ĉiaj brutoj, Rampaĵoj kaj flugilaj birdoj;

¹¹ Reĝoj de la tero kaj ĉiuj popoloj, Princoj kaj ĉiuj juĝantoj sur la tero;

¹² Junuloj kaj junulinoj, Maljunuloj kaj knaboj.

¹³ Ili gloru la nomon de la Eternulo, Ĉar sole Lia nomo estas alta, Lia majesto estas sur la tero kaj en la ĉielo.

¹⁴ Kaj Li altigis la kornon de Sia popolo, La gloron de ĉiuj Liaj fideluloj, De la filoj de Izrael, Lia plej proksima popolo. Haleluja!