¹ De David. Ne incitiĝu pro la malvirtuloj; Ne enviu tiujn, kiuj agas maljuste.

² Ĉar simile al herbo ili rapide dehakiĝas, Kaj kiel verda vegetaĵo ili forvelkas.

³ Fidu la Eternulon kaj faru bonon; Loĝu sur la tero kaj konservu honestecon.

⁴ Serĉu plezuron ĉe la Eternulo, Kaj Li plenumos la dezirojn de via koro.

⁵ Transdonu al la Eternulo vian vojon kaj fidu Lin, Kaj Li faros.

⁶ Kaj Li aperigos vian pravecon kiel lumon, Kaj vian justecon kiel tagmezon.

⁷ Silentu antaŭ la Eternulo kaj esperu al Li; Ne incitiĝu, kiam sukcesas homo, Kiu plenumas malbonajn intencojn.

⁸ Detenu vin de kolero kaj forlasu furiozon; Ne incitiĝu, ke vi ne faru malbonon.

⁹ Ĉar malbonfarantoj ekstermiĝos, Kaj la esperantaj al la Eternulo heredos la teron.

¹⁰ Ankoraŭ malmulte da tempo pasos, kaj la malpiulo jam ne ekzistos; Vi rigardos lian lokon, kaj li ne estos.

¹¹ Kaj la humiluloj heredos la teron Kaj ĝuos grandan pacon.

¹² Malvirtulo malbonintencas kontraŭ virtulo Kaj frapas kontraŭ li per siaj dentoj.

¹³ Sed mia Sinjoro ridas pri li; Ĉar Li vidas, ke venas lia tago.

¹⁴ Glavon nudigas la malvirtuloj kaj streĉas sian pafarkon, Por faligi mizerulon kaj malriĉulon kaj buĉi virtulon.

¹⁵ Ilia glavo trafos en ilian koron, Kaj iliaj pafarkoj rompiĝos.

¹⁶ Pli bona estas la malmulto, kiun havas virtulo, Ol la granda havo de multaj malpiuloj.

¹⁷ Ĉar la brakoj de malpiuloj rompiĝas; Sed la virtulojn la Eternulo subtenas.

¹⁸ La Eternulo scias la tagojn de la virtuloj; Kaj ilia havo restos eterne.

¹⁹ Ili ne estos hontigitaj en tempo malbona, Kaj en tagoj de malsato ili estos sataj.

²⁰ Ĉar la malvirtuloj pereos, Kaj la malamikoj de la Eternulo malaperos kiel beleco de la herbejoj, Ili malaperos kiel fumo.

²¹ Malpiulo prunteprenas kaj ne pagas; Sed piulo korfavoras kaj donas.

²² Ĉar Liaj benitoj heredos la teron, Kaj Liaj malbenitoj ekstermiĝos.

²³ De la Eternulo fortikiĝas la paŝoj de virta homo, Kaj lia vojo plaĉas al Li.

²⁴ Falante, li ne estos forĵetita; Ĉar la Eternulo subtenos lian manon.

²⁵ Mi estis juna kaj mi maljuniĝis, Kaj mi ne vidis virtulon forlasita, Nek liajn infanojn petantaj panon.

²⁶ Ĉiutage li korfavoras kaj pruntedonas, Kaj liaj infanoj estos benitaj.

²⁷ Forturniĝu de malbono kaj faru bonon, Kaj vi vivos eterne.

²⁸ Ĉar la Eternulo amas justecon, Kaj ne forlasas Siajn fidelulojn; Ĉiam ili estos gardataj; Sed la semo de la malpiuloj estos ekstermita.

²⁹ La virtuloj heredos la teron Kaj loĝos sur ĝi eterne.

³⁰ La buŝo de virtulo parolas saĝon, Kaj lia lango diras justecon.

³¹ La ordonoj de lia Dio estas en lia koro; Liaj paŝoj ne ŝanceliĝas.

³² Malvirtulo subrigardas virtulon Kaj celas mortigi lin.

³³ Sed la Eternulo ne lasos lin en liaj manoj, Kaj ne kondamnos lin, kiam li estos juĝata.

³⁴ Esperu al la Eternulo kaj tenu vin je Lia vojo, Kaj Li altigos vin, ke vi heredu la teron; Vi vidos la ekstermon de la malvirtuloj.

³⁵ Mi vidis malpiulon, kiu estis spitema, Kaj tenis sin larĝe, kiel sukplena multebranĉa arbo;

³⁶ Sed apenaŭ mi preterpasis, li jam ne ekzistis; Mi serĉis lin, kaj li jam ne estis trovebla.

³⁷ Konservu senkulpecon kaj celu veron, Ĉar estontecon havas homo pacema;

³⁸ Sed la krimuloj ĉiuj estos ekstermitaj; La estonteco de la malpiuloj pereos.

³⁹ La virtuloj havas helpon de la Eternulo; Li estas ilia forto en tempo de mizero.

⁴⁰ Kaj la Eternulo ilin helpos kaj savos; Li savos ilin de malbonuloj kaj helpos ilin, Ĉar ili fidas Lin.