¹ ¶ Na olgeta dispela graun em i bilong wanpela tok ples, na bilong wanpela toktok.

² Na em i kamap olsem, taim ol i lusim hap sankamap na wokabaut i go, long ol i lukim wanpela ples stret long hap bilong Sainar. Na ol i stap long dispela hap.

³ Na ol i tokim wanpela i go long narapela, Kaman, yumi wokim ol brik, na kukim ol tru. Na ol i yusim brik long senisim ston, na ol i bin yusim graun malumalu long senisim simen.

⁴ Na ol i tok, Kaman, yumi wokim wanpela biktaun na wanpela taua, husat antap bilong en i ken go inap long heven. Na yumi mekim wanpela nem bilong yumi, nogut yumi bruk nabaut long pes bilong dispela graun olgeta.

⁵ ¶ Na BIKPELA i kam daun bilong lukim dispela biktaun na dispela taua, dispela ol pikinini bilong ol man i wokim.

⁶ Na BIKPELA i tok, Lukim, ol manmeri i wanpela, na olgeta i gat wanpela tok ples. Na dispela ol i stat long mekim. Na nau i no gat wanpela samting bai i pasim ol, dispela ol i bin tingting strong long mekim.

⁷ Kaman, Yumi go daun, na long dispela hap paulim tok ples bilong ol, inap long ol i no inap save long toktok wanpela i go long ol arapela.

⁸ Olsem na BIKPELA i brukim ol nabaut i lusim dispela hap antap long pes bilong olgeta hap bilong dispela graun. Na ol i lusim wok bilong wokim dispela biktaun.

⁹ Olsem na ol i kolim nem bilong en Babel. Bilong wanem, long dispela hap BIKPELA i bin paulim tok ples bilong olgeta bilong dispela graun. Na long dispela hap BIKPELA i bin brukim ol nabaut antap long pes bilong dispela graun olgeta.

¹⁰ ¶ Ol dispela em ol lain tumbuna bilong Siem. Siem i gat 100 krismas, na em i kamapim Arfaksat, tupela yia bihain long tait.

¹¹ Na Siem i stap laip bihain long em i kamapim Arfaksat 500 yia, na kamapim ol pikinini man na ol pikinini meri.

¹² Na Arfaksat i stap laip 35-pela yia, na kamapim Sala.

¹³ Na Arfaksat i stap laip bihain long em i kamapim Sala 403 yia, na kamapim ol pikinini man na ol pikinini meri.

¹⁴ Na Sala i stap laip 30-pela yia, na kamapim Eber.

¹⁵ Na Sala i stap laip bihain long em i kamapim Eber 403 yia, na kamapim ol pikinini man na ol pikinini meri.

¹⁶ Na Eber i stap laip 34-pela yia, na kamapim Pelek.

¹⁷ Na Eber i stap laip bihain long em i kamapim Pelek 430 yia, na kamapim ol pikinini man na ol pikinini meri.

¹⁸ Na Pelek i stap laip 30-pela yia, na kamapim Reu.

¹⁹ Na Pelek i stap laip bihain long em i kamapim Reu 209 yia, na kamapim ol pikinini man na ol pikinini meri.

²⁰ Na Reu i stap laip 32-pela yia, na kamapim Seruk.

²¹ Na Reu i stap laip bihain long em i kamapim Seruk 207 yia, na kamapim ol pikinini man na ol pikinini meri.

²² Na Seruk i stap laip 30-pela yia, na kamapim Nehor.

²³ Na Seruk i stap laip bihain long em i kamapim Nehor 200 yia, na kamapim ol pikinini man na ol pikinini meri.

²⁴ Na Nehor i stap laip 29-pela yia, na kamapim Tera.

²⁵ Nehor i stap laip bihain long em i kamapim Tera 119 yia, na kamapim ol pikinini man na ol pikinini meri.

²⁶ Na Tera i stap laip 70-pela yia, na kamapim Ebram, Nehor, na Haran.

²⁷ ¶ Nau ol dispela em ol lain tumbuna bilong Tera. Tera i kamapim Ebram, Nehor, na Haran. Na Haran i kamapim Lot.

²⁸ Na Haran i dai bipo long papa bilong em Tera long ples mama i karim em, long Ur bilong ol Kaldi.

²⁹ Na Ebram na Nehor i kisim ol meri i kam long ol. Nem bilong meri bilong Ebram em Sarai. Na nem bilong meri bilong Nehor, Milka, pikinini meri bilong Haran, papa bilong Milka na papa bilong Iska.

³⁰ Tasol Sarai i no inap long karim. Em i no gat wanpela pikinini.

³¹ Na Tera i kisim Ebram, pikinini man bilong em, na Lot, pikinini man bilong Haran, pikinini man bilong pikinini man bilong em, na Sarai, tambu pikinini meri bilong em, meri bilong pikinini man bilong em Ebram. Na ol i go ausait wantaim ol i lusim Ur bilong ol Kaldi, bilong go insait long hap bilong Kenan. Na ol i kamap long Haran, na stap long dispela hap.

³² Na ol de bilong Tera i em 205 yia. Na Tera i dai long Haran.