¹ ¶ O olgeta wan wan i stap nek i drai, yupela kam long ol wara, na man i no gat mani, yupela kam baim na kaikai, yes, kam na baim wain na susu na yupela i no mas i gat mani na i nogat pe long em.

² Bilong wanem yupela i tromoi mani long dispela samting i no bret? Na yupela i tromoi hatwok bilong yupela bilong kisim dispela samting i no inapim yupela? Harim gut tok bilong Mi na yupela kaikai dispela samting i gutpela, na larim tewel bilong yupela i amamasim em yet long i stap patpela.

³ Putim ia bilong yupela i go antap na kam long Mi. Harim, na tewel bilong yupela bai stap laip, na bai Mi wokim wanpela kontrak wantaim yupela na em bai stap oltaim oltaim. Yes, em ol sori i tru olgeta bilong Devit.

⁴ Harim, Mi bin givim em bilong i stap wanpela witnes long ol manmeri, wanpela pasman na hetman long ol manmeri.

⁵ Harim, yu bai singaut long wanpela kantri yu no save long em, na ol kantri i no bin save long yu bai ran long yu, na as bilong dispela em i BIKPELA na God bilong yu, na bilong dispela Wanpela i Holi bilong Isrel, long wanem Em i bin givim glori long yu.

⁶ ¶ Wok long painim BIKPELA long taim yupela inap lukim Em, yupela mas singaut long Em taim Em i stap klostu.

⁷ Larim man nogut i givim baksait long rot bilong em, na man i no stretpela i lusim ol tingting bilong em. Na larim em i kam bek long BIKPELA, na Em bai sori long em. Na kam bek long God bilong yumi, long wanem Em bai lusim planti pe nogut bilong sin.

⁸ BIKPELA i tok, Long wanem ol tingting bilong Mi i no ol tingting bilong yupela, na tu ol pasin bilong yupela i no ol pasin bilong Mi.

⁹ Long wanem olsem ol heven i stap antap long dispela graun, olsem tasol ol pasin bilong Mi i antap long ol pasin bilong yupela, na ol tingting bilong Mi i antap long ol tingting bilong yupela.

¹⁰ Long wanem olsem ren na ais i kam daun long heven, na dispela i no go bek antap, tasol em i givim wara long dispela graun na mekim em i karim na sutim liklik lip, bai em i ken givim pikinini kaikai long man i tromoi nabaut bilong planim, na bret long man husat i kaikai.

¹¹ Tok bilong Mi i go lusim maus bilong Mi bai stap olsem tasol. Bai em i no kam bek long Mi nating, tasol em bai mekim dispela samting Mi laikim, na em bai mekim gutpela wok long wok Mi bin salim em i go bilong mekim.

¹² Long wanem yupela bai go wantaim amamas tru, na bai yupela i gat bel isi taim wanpela i go pas long yupela. Ol maunten na ol liklik maunten bai kirap long singim song long pes bilong yupela, na olgeta diwai bilong ples kunai bai paitim ol han bilong ol.

¹³ Diwai fir bai senisim diwai i gat nil, na diwai murtil bai senisim rop i gat nil. Na dispela bai i stap bilong makim nem bilong BIKPELA, na bilong wanpela mak bilong i stap oltaim oltaim na bai em i no bagarap.