¹ וירא יעקב כי יש שבר במצרים ויאמר יעקב אל בניו למה תתיראו

² ויאמר הנה שמעתי כי יש שבר במצרים רדו שמה ושברו לנו משם ונחיה ולא נמות

³ וירדו אחי יוסף עשרה לשבר בר ממצרים

⁴ ואת בנימים אחי יוסף לא שלח יעקב את אחיו כי אמר פן יקראנו אסון

⁵ ויבאו בני ישראל לשבר בתוך הבאים כי היה הרעב בארץ כנען

⁶ ויוסף הוא השליט על הארץ והוא המשביר לכל עם הארץ ויבאו אחי יוסף וישתחוו לו אפים ארצה

⁷ וירא יוסף את אחיו ויכרם ויתנכר אליהם וידבר אתם קשות ויאמר אליהם מאין באתם ויאמרו מארץ כנען לשבר אכל

⁸ ויכר יוסף את אחיו והם לא הכרהו

⁹ ויזכר יוסף את החלמות אשר חלם להם ויאמר אליהם מרגלים אתם לראות את ערות הארץ באתם

¹⁰ ויאמרו אליו לא אדני ועבדיך באו לשבר אכל

¹¹ כלנו בני איש אחד אנחנו כנים אנחנו לא היו עבדיך מרגלים

¹² ויאמר אליהם לא כי ערות הארץ באתם לראות

¹³ ויאמרו שנים עשר עבדיך אחים אנחנו בני איש אחד בארץ כנען והנה הקטן את אבינו היום והאחד איננו

¹⁴ ויאמר אליהם יוסף הוא אשר דברתי אליכם לאמר מרגלים אתם

¹⁵ בזאת תבחנו חי פרעה אם תצאו מזה כי אם בבוא אחיכם הקטן הנה

¹⁶ שלחו מכם אחד ויקח את אחיכם ואתם האסרו ויבחנו דבריכם האמת אתכם ואם לא חי פרעה כי מרגלים אתם ויאמרו לא יוכל הנער לעזב את אביו ועזב את אביו ומת

¹⁷ ויאסף אתם אל משמר שלשת ימים

¹⁸ ויאמר אליהם יוסף ביום השלישי זאת עשו וחיו את האלהים אני ירא

¹⁹ אם כנים אתם אחיכם האחד יאסר בבית משמרכם ואתם לכו והביאו את שבר רעבון בתיכם

²⁰ ואת אחיכם הקטן תביאון אלי ויאמנו דבריכם ולא תמותון ויעשו כן

²¹ ויאמרו איש אל אחיו אבל אשמים אנחנו על אחינו אשר ראינו בצרת נפשו בהתחננו אלינו ולא שמענו על כן באה עלינו כל הצרה הזאת

²² ויען ראובן אתם לאמר הלוא דברתי אליכם לאמר אל תחטאו בילד ולא שמעתם וגם דמו הנה נדרש

²³ והם לא ידעו כי שמע יוסף כי המליץ בינתם

²⁴ ויסב מעליהם ויבך וישב אליהם וידבר אליהם ויקח מאתם את שמעון ויאסר אתו לעיניהם

²⁵ ויצו יוסף וימלאו את כליהם בר ולהשיב את כספיהם איש אל שקו ולתת להם צדה לדרך ויעש להם כן

²⁶ וישאו את שברם על חמריהם וילכו משם

²⁷ ויפתח האחד את שקו לתת מספה לחמרו במלון וירא את כספו והנה הוא בפי אמתחתו

²⁸ ויאמר אל אחיו הושב כספי וגם הנה הוא באמתחתי ויצא לבם ויחרדו איש על אחיו לאמר מה זאת עשה אלהים לנו

²⁹ ויבאו אל יעקב אביהם ארצה כנען ויגדו לו את כל הקרות אתם לאמר

³⁰ דבר האיש אדני הארץ אתנו קשות ויתן אתנו כמרגלים את הארץ

³¹ ונאמר אליו כנים אנחנו לא היינו מרגלים

³² שנים עשר אחים אנחנו בני אבינו והאחד איננו והקטן היום את אבינו בארץ כנען

³³ ויאמר אלינו האיש אדני הארץ בזאת אדע כי כנים אתם אחיכם האחד הניחו אתי ואת רעבון בתיכם קחו ולכו

³⁴ והביאו את אחיכם הקטן אלי ואדעה כי לא מרגלים אתם כי כנים אתם את אחיכם אתן לכם ואת הארץ תסחרו

³⁵ ויהיו הם מריקים שקיהם והנה איש צרור כספו בשקו ויראו את צררות כספיהם הם ואביהם וייראו

³⁶ ויאמר אליהם יעקב אביהם אתי שכלתם יוסף איננו ושמעון איננו ואת בנימים תקחו עלי היו כלנה

³⁷ ויאמר ראובן אל אביו לאמר את שני בני תמית אם לא אביאנו אליך תנה אתו על ידי ואני אשיבנו אליך

³⁸ ויאמר לא ירד בני עמכם כי אחיו מת והוא לבדו נשאר וקראהו אסון בדרך אשר תלכו בה והורדתם את שיבתי ביגון שאלה