¹ ויכלו השמים והארץ וכל צבאם

² ויכל אלהים ביום הששי מלאכתו אשר עשה וישבת ביום השביעי מכל מלאכתו אשר עשה

³ ויברך אלהים את יום השביעי ויקדש אתו כי בו שבת מכל מלאכתו אשר ברא אלהים לעשות

⁴ אלה תולדת השמים והארץ בהבראם ביום עשות יהוה אלהים שמימ וארץ .

⁵ וכל שיח השדה טרם יהיה בארץ וכל עשב השדה טרם יצמח כי לא המטיר יהוה אלהים על הארץ ואדם אין לעבד את האדמה

⁶ ואד יעלה מן הארץ והשקה את כל פני האדמה

⁷ ויצר יהוה אלהים את האדם עפר מן האדמה ויפח באפיו נשמת חיים ויהי אדם לנפש חיה

⁸ ויטע יהוה אלהים גן בעדן מקדם וישם שם את האדם אשר יצר

⁹ ויצמח יהוה אלהים מן האדמה את כל עץ נחמד למראה וטוב למאכל ועץ החיים בתוך הגן ועץ הדעת טוב ורע

¹⁰ ונהר יצא מעדן להשקות את הגן ומשם יפרד והיה לארבעה ראשים

¹¹ שם האחד פישון הוא הסבב את כל ארץ החוילה אשר שם הזהב

¹² וזהב הארץ ההיא טוב מאד שם הבדלח ואבן השהם

¹³ ושם הנהר השני גיחון הוא הסבב את כל ארץ כוש

¹⁴ ושם הנהר השלישי חדקל הוא ההלך קדמת אשור והנהר הרביעי הוא פרת

¹⁵ ויקח יהוה אלהים את האדם וינחהו בגן עדן לעבדה ולשמרה

¹⁶ ויצו יהוה אלהים על האדם לאמר מכל עץ הגן אכל תאכל

¹⁷ ומעץ הדעת טוב ורע לא תאכל ממנו כי ביום אכלך ממנו מות תמות

¹⁸ ויאמר יהוה אלהים לא טוב היות האדם לבדו אעשה לו עזר כנגדו

¹⁹ ויצר יהוה אלהים עוד מן האדמה את כל חית השדה ואת כל עוף השמים ויבא אל האדם לראות מה יקרא לו וכל אשר יקרא לו האדם נפש חיה הוא שמו

²⁰ ויקרא האדם שמות לכל הבהמה ולעוף השמים ולכל חית השדה ולאדם לא מצא עזר כנגדו

²¹ ויפל יהוה אלהים תרדמה על האדם ויישן ויקח אחת מצלעתיו ויסגר בשר תחתנה

²² ויבן יהוה אלהים את הצלע אשר לקח מן האדם לאשה ויביאה אל האדם

²³ ויאמר האדם זאת הפעם עצם מעצמי ובשר מבשרי לזאת יקרא אשה כי מאישה לקחה זאת

²⁴ על כן יעזב איש את אביו ואת אמו ודבק באשתו והיה משניהמ לבשר אחד

²⁵ ויהיו שניהם ערמים אדם ואשתו ולא יתבששו