¹ בראשית ברא אלהים את השמים ואת הארץ

² והארץ היתה תהו ובהו וחשך על פני תהום ורוח אלהים מרחפת על פני המים

³ ויאמר אלהים יהי אור ויהי אור

⁴ וירא אלהים את האור כי טוב ויבדל אלהים בין האור ובין החשך

⁵ ויקרא אלהים לאור יום ולחשך קרא לילה ויהי ערב ויהי בקר יום אחד

⁶ ויאמר אלהים יהי רקיע בתוך המים ויהי מבדיל בין מים למים

⁷ ויעש אלהים את הרקיע ויבדל בין המים אשר מתחת לרקיע ובין המים אשר מעל לרקיע ויהי כן

⁸ ויקרא אלהים לרקיע שמים ויהי ערב ויהי בקר יום שני

⁹ ויאמר אלהים יקוו המים מתחת השמים אל מקום אחד ותראה היבשה ויהי כן

¹⁰ ויקרא אלהים ליבשה ארץ ולמקוה המים קרא ימים וירא אלהים כי טוב

¹¹ ויאמר אלהים תדשא הארץ דשא עשב מזריע זרע ועץ פרי עשה פרי למינו אשר זרעו בו על הארץ ויהי כן

¹² ותוצא הארץ דשא עשב מזריע זרע למינהו ועץ עשה פרי אשר זרעו בו למינהו וירא אלהים כי טוב

¹³ ויהי ערב ויהי בקר יום שלישי

¹⁴ ויאמר אלהים יהי מאורות ברקיע השמים להאיר על הארץ ולהבדיל בין היום ובין הלילה והיו לאתות ולמועדים ולימים ושנים

¹⁵ והיו למאורות ברקיע השמים להאיר על הארץ ויהי כן

¹⁶ ויעש אלהים את שני המאורות הגדלים את המאור הגדול לממשלת היום ואת המאור הקטן לממשלת הלילה ואת הכוכבים

¹⁷ ויתן אתם אלהים ברקיע השמים להאיר על הארץ

¹⁸ ולמשל ביום ובלילה ולהבדיל בין האור ובין החשך וירא אלהים כי טוב

¹⁹ ויהי ערב ויהי בקר יום רביעי

²⁰ ויאמר אלהים ישרצו המים שרץ נפש חיה ועוף יעפף על הארץ על פני רקיע השמים

²¹ ויברא אלהים את התנינים הגדלים ואת כל נפש החיה הרמשת אשר שרצו המים למיניהם ואת כל עוף כנף למינהו וירא אלהים כי טוב

²² ויברך אתם אלהים לאמר פרו ורבו ומלאו את המים בימים והעוף ירבה בארץ

²³ ויהי ערב ויהי בקר יום חמישי

²⁴ ויאמר אלהים תוצא הארץ נפש חיה למינה בהמה ורמש וחית הארץ למינה ויהי כן

²⁵ ויעש אלהים את חית הארץ למינה ואת הבהמה למינה ואת כל רמש האדמה למינהו וירא אלהים כי טוב

²⁶ ויאמר אלהים נעשה אדם בצלמנו וכדמותנו וירדו בדגת הים ובעוף השמים ובבהמה ובכל הארץ ובכל הרמש הרמש על הארץ

²⁷ ויברא אלהים את האדם בצלמו בצלם אלהים ברא אתו זכר ונקבה ברא אתם

²⁸ ויברך אתם אלהים ויאמר להם אלהים פרו ורבו ומלאו את הארץ וכבשוה ורדו בדגת הים ובעוף השמים ובכל החיה הרמשת על הארץ

²⁹ ויאמר אלהים הנה נתתי לכם את כל עשב זרע זרע אשר על פני כל הארץ ואת כל עץ אשר בו פרי עץ זרע זרע לכם יהיה לאכלה

³⁰ ולכל חית הארץ ולכל עוף השמים ולכל הרמש על הארץ אשר בו נפש חיה את כל ירק עשב לאכלה ויהי כן

³¹ וירא אלהים את כל אשר עשה והנה טוב מאד ויהי ערב ויהי בקר יום הששי