¹ Kaj Ijob respondis kaj diris:

² Certe, vi solaj estas homoj, Kaj kun vi mortos la saĝo.

³ Mi ankaŭ havas koron, kiel vi; Mi ne estas malpli valora ol vi; Kiu ne povas paroli tiele?

⁴ Mi fariĝis mokataĵo por mia amiko, Mi, kiu vokadis al Dio kaj estis aŭskultata; Virtulo kaj senkulpulo fariĝis mokataĵo;

⁵ Malestimata lucerneto li estas antaŭ la pensoj de feliĉuloj, Pretigita por migrantoj.

⁶ Bonstataj estas la tendoj de rabistoj, Kaj sendanĝerecon havas la incitantoj de Dio, Tiuj, kiuj portas Dion en sia mano.

⁷ Vere, demandu la brutojn, kaj ili instruos vin; La birdojn de la ĉielo, kaj ili diros al vi;

⁸ Aŭ parolu kun la tero, kaj ĝi klarigos al vi; Kaj rakontos al vi la fiŝoj de la maro.

⁹ Kiu ne ekscius el ĉio ĉi tio, Ke la mano de la Eternulo tion faris,

¹⁰ De Tiu, en kies mano estas la animo de ĉio vivanta Kaj la spirito de ĉiu homa karno?

¹¹ La orelo esploras ja la parolon, Kaj la palato gustumas al si la manĝaĵon.

¹² La maljunuloj posedas saĝon, Kaj la grandaĝuloj kompetentecon.

¹³ Ĉe Li estas la saĝo kaj la forto; Ĉe Li estas konsilo kaj kompetenteco.

¹⁴ Kion Li detruas, tio ne rekonstruiĝas; Kiun Li enŝlosos, tiu ne liberiĝos.

¹⁵ Kiam Li digas la akvon, ĝi elsekiĝas; Kiam Li fluigas ĝin, ĝi renversas la teron.

¹⁶ Ĉe Li estas potenco kaj forto; Lia estas tiu, kiu eraras, kaj tiu, kiu erarigas.

¹⁷ Li irigas konsilistojn kiel erarvagantojn, Kaj la juĝistojn Li faras malsaĝaj.

¹⁸ La ligilojn de reĝoj Li malligas, Kaj Li ligas per zono iliajn lumbojn.

¹⁹ Li erarvagigas la pastrojn Kaj faligas la potenculojn.

²⁰ Li mutigas la lipojn de fidinduloj Kaj forprenas de maljunuloj la prudenton.

²¹ Li verŝas honton sur eminentulojn Kaj malfirmigas la zonon de potenculoj.

²² Li malkovras profundaĵon el meze de mallumo, Kaj mortan ombron Li elirigas en la lumon.

²³ Li grandigas naciojn kaj pereigas ilin, Disvastigas naciojn kaj forpelas ilin.

²⁴ Li senkuraĝigas la ĉefojn de la popolo de la lando Kaj erarvagigas ilin en dezerto senvoja;

²⁵ Ili palpas en mallumo, en senlumeco; Kaj Li ŝanceliĝigas ilin kiel ebriuloj.