¹ Ekparolis Elifaz, la Temanano, kaj diris:

² Ĉu Dion povas instrui homo? Ĉu povas Lin instrui eĉ saĝulo?

³ Ĉu por la Plejpotenculo tio estas utila, se vi estas virta? Kaj ĉu Li havas profiton de tio, se via konduto estas pia?

⁴ Ĉu pro timo antaŭ vi Li disputos kun vi, Iros kun vi al juĝo?

⁵ Via malvirteco estas ja granda, Kaj viaj malbonagoj ne havas finon.

⁶ Vi prenis de viaj fratoj garantiaĵon vane, De preskaŭ-nuduloj vi deprenis la vestojn;

⁷ Al laculo vi ne donis akvon por trinki, Kaj al malsatulo vi rifuzis panon;

⁸ Per forta brako vi akiris teron, Kaj dank� al eminenteco vi loĝis sur ĝi;

⁹ Vidvinojn vi foririgis kun nenio, Kaj la brakojn de orfoj vi frakasis.

¹⁰ Pro tio ĉirkaŭe de vi estas kaptiloj, Kaj subita teruro vin timigas.

¹¹ Aŭ pro mallumo vi nenion vidas, Kaj multego da akvo vin kovris?

¹² Ĉu ne estas Dio tie alte en la ĉielo? Rigardu la stelojn, kiel alte ili estas.

¹³ Kaj vi diras: Kion scias Dio? Ĉu Li povas juĝi en mallumo?

¹⁴ La nuboj kovras Lin, kaj Li ne vidas; Kaj Li nur rondiras en la rondo de la ĉielo.

¹⁵ Ĉu vi konservas la vojon antikvan, Kiun iradis homoj malpiaj,

¹⁶ Kiuj estis kaptitaj antaŭtempe, Kaj kies grundo disverŝiĝis kiel rivero,

¹⁷ Kiuj parolis al Dio: Foriru de ni! Kion povas fari al ni la Plejpotenculo?

¹⁸ Kvankam Li plenigis iliajn domojn per bonaĵo. Sed la pensmaniero de malvirtuloj estas malproksima de mi.

¹⁹ La virtuloj vidos kaj ĝojos; La senkulpulo mokos ilin:

²⁰ Certe malaperis nia kontraŭulo, Kaj kio restis, tion ekstermis fajro.

²¹ Interkonsentu do kun Li, kaj vi havos pacon; Per tio venos al vi bono.

²² Prenu el Lia buŝo instruon, Kaj metu Liajn vortojn en vian koron.

²³ Se vi revenos al la Plejpotenculo, vi estos konstruita; Forigu malpiaĵon el via tendo.

²⁴ Ĵetu en la polvon la multekostan metalon, Kaj la Ofiran oron sur la ŝtonojn de la torentoj;

²⁵ Tiam la Plejpotenculo estos via oro kaj via brilanta arĝento;

²⁶ Ĉar tiam vi havos vian plezuron en la Plejpotenculo, Kaj vi levos al Dio vian vizaĝon;

²⁷ Vi preĝos al Li, kaj Li vin aŭskultos; Kaj viajn sanktajn promesojn vi plenumos;

²⁸ Se vi ion decidos, ĝi plenumiĝos ĉe vi; Kaj super viaj vojoj brilos lumo.

²⁹ Ĉar tiujn, kiuj humiliĝis, Li altigos; Kaj kiu mallevas la okulojn, tiu estos savita.

³⁰ Ankaŭ tiun, kiu ne estis senkulpa, Li savos; Tia estos savita pro la pureco de viaj manoj.