Namba Tri Buk Bilong Moses, Ol i Kolim

Livai

¹ ¶ Na BIKPELA i singaut long Moses na tokim em, na tok i kamaut long haus sel holi bilong bung bilong ol manmeri na tok,

² Toktok long ol pikinini bilong Isrel na tok long ol olsem, Sapos wanpela man bilong yupela i bringim wanpela ofa i go long BIKPELA, yupela mas bringim ofa bilong yupela i bilong ol bulmakau samting, em bilong bung bilong ol bulmakau na bilong bung bilong sipsip o meme.

³ ¶ Sapos ofa bilong em i stap sakrifais bilong kuk olgeta na i bilong bung bilong ol bulmakau, larim em i ofaim wanpela bulmakau man i no gat mak nogut. Em i mas ofaim dispela long laik bilong em yet long dua bilong haus sel holi bilong bung bilong ol manmeri long pes bilong BIKPELA.

⁴ Na em i mas putim han bilong em antap long het bilong dispela ofa i kuk olgeta. Na BIKPELA bai orait long dispela i bilong em long mekim ofa bilong karamapim long mekim i kamap wanbel i bilong em.

⁵ Na em i mas kilim i dai dispela bulmakau man long pes bilong BIKPELA. Na ol pris, em ol pikinini man bilong Eron, ol i mas bringim dispela blut na tromoi isi isi dispela blut raun nabaut antap long alta i stap klostu long dua bilong haus sel holi bilong bung bilong ol manmeri.

⁶ Na em i mas rausim skin bilong dispela ofa i kuk olgeta na katim dispela i kamap ol hap bilong em.

⁷ Na ol pikinini man bilong Eron dispela pris i mas putim paia antap long alta na slipim ol diwai long stretpela we antap long paia.

⁸ Na ol pris, em ol pikinini man bilong Eron, ol i mas slipim ol hap, em het na gris, long stretpela we antap long diwai i stap antap long paia na dispela i stap antap long alta.

⁹ Tasol em i mas wasim ol insait bilong bel bilong ofa na ol lek bilong ofa long wara. Na pris i mas kukim olgeta antap long alta long i stap wanpela sakrifais i kuk olgeta, em ofa em i mekim long paia bilong i stap wanpela switpela smel i go long BIKPELA.

¹⁰ Na sapos ofa bilong em i stap long ol bung bilong sipsip samting, em bilong ol sipsip o bilong ol meme bilong i stap wanpela sakrifais i kuk olgeta, em i mas bringim wanpela i man na i no gat wanpela mak nogut long em.

¹¹ Na em i mas kilim i dai dispela long sait bilong alta i go long not long pes bilong BIKPELA. Na ol pris, em ol pikinini man bilong Eron, ol i mas tromoi isi isi blut bilong ofa raun nabaut antap long alta.

¹² Na em i mas katim dispela long ol hap wantaim het bilong em na gris bilong em. Na pris i mas slipim ol long stretpela we antap long diwai na dispela i stap antap long paia na dispela i stap antap long alta.

¹³ Tasol em i mas wasim ol insait bilong bel na ol lek long wara. Na pris i mas bringim olgeta bilong dispela na kukim dispela antap long alta. Em i wanpela sakrifais i kuk olgeta na wanpela ofa em i mekim long paia, bilong i stap wanpela switpela smel i go long BIKPELA.

¹⁴ Na sapos sakrifais i kuk olgeta i bilong ofa bilong em i go long BIKPELA em i stap bilong ol pisin samting, orait em i mas bringim ofa bilong em i long ol pisin ol i kolim turtel dov o long ol yangpela pisin.

¹⁵ Na pris i mas bringim dispela i kam long alta na rausim het bilong em na kukim dispela antap long alta. Na pris i mas holim em strong inap long blut i kapsait long sait bilong alta.

¹⁶ Na pris i mas rausim bilum bilong holim kaikai bilong pisin wantaim ol gras bilong em na tromoi dispela long sait bilong alta long hap san kamap long ples bilong ol sit bilong paia.

¹⁷ Na pris i mas brukim dispela wantaim ol wing bilong em, tasol em i no ken brukim long tupela hap. Na pris i mas kukim dispela antap long alta, em antap long diwai i stap antap long paia. Dispela em i sakrifais i kuk olgeta na wanpela ofa pris i mekim long paia bilong i stap wanpela switpela smel i go long BIKPELA.