¹ וידבר יהוה אל משה לאמר

² דבר אל בני ישראל ואמרת אליהם כי תבאו אל ארץ מושבתיכם אשר אני נתן לכם

³ ועשיתם אשה ליהוה עלה או זבח לפלא נדר או נדבה או במועדיכם לעשות ריח ניחח ליהוה מן הבקר או מן הצאן

⁴ והקריב המקריב את קרבנו ליהוה מנחה סלת עשרון בלול ברבעית ההין שמן

⁵ ויין לנסך רבעית ההין תעשה על העלה או לזבח לכבש האחד

⁶ או לאיל תעשה מנחה סלת שני עשרנים בלול בשמן שלשית ההין

⁷ ויין לנסך שלשית ההין תקריב ריח ניחח ליהוה

⁸ וכי תעשה בן בקר עלה או זבח לפלא נדר או שלמים ליהוה

⁹ והקריב על בן הבקר מנחה סלת שלשה עשרנים בלול בשמן חצי ההין

¹⁰ ויין תקריב לנסך חצי ההין אשה ריח ניחח ליהוה

¹¹ ככה יעשה לשור האחד או לאיל האחד או לשה בכבשים או בעזים

¹² כמספרם אשר תעשו ככה תעשו לאחד במספרם

¹³ כל האזרח יעשה ככה את אלה להקריב אשה ריח ניחח ליהוה

¹⁴ וכי יגור אתכם גר או אשר בתוככם לדרתיכם ועשה אשה ריח ניחח ליהוה כאשר תעשו כן יעשה

¹⁵ הקהל חקה אחת לכם ולגר הגר חקת עולם לדרתיכם ככם כגר יהיה לפני יהוה

¹⁶ תורה אחת ומשפט אחד יהיה לכם ולגר הגר אתכם

¹⁷ וידבר יהוה אל משה לאמר

¹⁸ דבר אל בני ישראל ואמרת אליהם בבאכם אל הארץ אשר אני מביא אתכם שמה

¹⁹ והיה באכלכם מלחם הארץ תרימו תרומה ליהוה

²⁰ ראשית ערסתיכם חלה תרימו תרומה כתרומת גרן כן תרימו אתה

²¹ מראשית ערסתיכם תתנו ליהוה תרומה לדרתיכם

²² וכי תשגו ולא תעשו את כל המצות האלה אשר דבר יהוה אל משה

²³ את כל אשר צוה יהוה אליכם ביד משה למן היום אשר צוה יהוה והלאה לדרתיכם

²⁴ והיה אם מעיני העדה נעשתה לשגגה ועשו כל העדה פר בן בקר אחד לעלה לריח ניחח ליהוה ומנחתו ונסכו כמשפט ושעיר עזים אחד לחטאת

²⁵ וכפר הכהן על כל עדת בני ישראל ונסלח להם כי שגגה היא והם הביאו את קרבנם אשה ליהוה וחטאתם לפני יהוה על שגגתם

²⁶ ונסלח לכל עדת בני ישראל ולגר הגר בתוכם כי לכל העם בשגגה

²⁷ ואם נפש אחת תחטא בשגגה והקריבה עז בת שנתה לחטאת

²⁸ וכפר הכהן על הנפש השגגת בחטאה בשגגה לפני יהוה לכפר עליו ונסלח לו

²⁹ האזרח בבני ישראל ולגר הגר בתוכם תורה אחת יהיה לכם לעשה בשגגה

³⁰ והנפש אשר תעשה ביד רמה מן האזרח ומן הגר את יהוה הוא מגדף ונכרתה הנפש ההיא מקרב עמיה

³¹ כי דבר יהוה בזה ואת מצותיו הפר הכרת תכרת הנפש ההיא עונה בה

³² ויהיו בני ישראל במדבר וימצאו איש מקשש עצים ביום השבת

³³ ויקריבו אתו המצאים אתו מקשש עצים אל משה ואל אהרן ואל כל העדה

³⁴ ויניחו אתו במשמר כי לא פרש מה יעשה לו

³⁵ ויאמר יהוה אל משה מות יומת האיש רגמו אתו באבנים כל העדה מחוץ למחנה

³⁶ ויוציאו אתו כל העדה אל מחוץ למחנה וירגמו אתו באבנים וימת כאשר צוה יהוה את משה

³⁷ ויאמר יהוה אל משה לאמר

³⁸ דבר אל בני ישראל ואמרת אליהם ועשו להם ציציות על כנפי בגדיהם לדרתם ונתנו על ציצת הכנף פתיל תכלת

³⁹ והיו לכם לציציות וראיתם אתם וזכרתם את כל מצות יהוה ועשיתם אתם ולא תתרו אחרי לבבכם ואחרי עיניכם אשר אתם זנים אחריהם

⁴⁰ למען תזכרו ועשיתם את כל מצותי והייתם קדשים לאלהיכם

⁴¹ אני יהוה אלהיכם אשר הוצאתי אתכם מארץ מצרים להיות לכם לאלהים אני יהוה אלהיכם