¹ Павел и Силуан и Тимофей, церкви Солунстей, о Бозе Отце нашем и Господе Иисусе Христе:

² благодать вам и мир от Бога Отца нашего, и Господа Иисуса Христа.

³ Благодарити должни есмы Бога всегда о вас, братие, якоже достойно есть, яко превозрастает вера ваша, и множится любовь единаго коегождо всех вас друг ко другу:

⁴ яко самем нам хвалитися о вас в церквах Божиих, о терпении вашем и вере во всех гонениих ваших и скорбех, яже приемлете,

⁵ показание праведнаго суда Божия, во еже сподобитися вам Царствия Божия, егоже ради и страждете.

⁶ Аще убо праведно у Бога, воздати скорбь оскорбляющым вас,

⁷ а вам оскорбляемым отраду с нами, во откровении Господа Иисуса с небесе, со Ангелы силы Своея,

⁸ во огни пламенне дающаго отмщение не ведущым Бога и не послушающым благовествования Господа нашего Иисуса Христа:

⁹ иже муку приимут, погибель вечную, от лица Господня и от славы крепости Его,

¹⁰ егда приидет прославитися во святых Своих и дивен быти во всех веровавших, яко уверися свидетельство наше в вас, в день он.

¹¹ За сие и молимся всегда о вас, да вы сподобит званию Бог наш и исполнит всяко благоволение благости и дело веры в силе,

¹² яко да прославится имя Господа нашего Иисуса Христа в вас, и вы в Нем, по благодати Бога нашего и Господа Иисуса Христа.