Chapter 19
1 I go long namba wan man bilong wokim Musik, Wanpela Sam bilong Devit.¶ Ol heven i tokaut long glori bilong God. Na spes i soim wok bilong han bilong Em.
2 Long wanpela de i go long narapela de ol i autim tok. Na long wanpela nait i go long narapela nait ol i soim save.
3 I no gat wanpela tok o tok ples we man i no harim nek bilong ol.
4 Meta bilong ol i go long olgeta hap bilong dispela graun. Na ol tok bilong ol i go long arere bilong dispela graun. Em i bin sanapim haus sel bilong san insait long ol.
5 I olsem man i laik marit na em i lusim rum bilong en. Na em i save amamas tru, olsem strongpela man i amamas tru long ran long resis.
6 Ples bilong em i ken go ausait, em long arere bilong heven. Na em i save raun long ol arere bilong en. Na i no gat wanpela samting inap hait long hat bilong en.
7 ¶ Lo bilong BIKPELA i stretpela olgeta, na em i senisim bilip bilong tewel. Testimoni bilong BIKPELA i stap strong, na Em i givim save tru long ol man i no gat save.
8 Ol lo bilong BIKPELA ol i bin raitim, ol i stretpela, na ol i givim amamas tru long bel. Strongpela tok bilong BIKPELA i klin olgeta, na em i givim lait long ol ai.
9 Pret long BIKPELA em i klin, na em i stap oltaim oltaim. Ol tok bilong pe bilong kot bilong BIKPELA em i tru na stretpela pasin olgeta.
10 Na man i mas laikim ol moa long em i laikim gol, yes moa long planti naispela gol. Na tu swit bilong ol i winim swit bilong hani na dispela samting hani i stap long em.
11 Na moa tu ol i givim tok long wokboi bilong Yu i mas lukaut. Na i gat bikpela pe long holimpas long ol.
12 Husat inap save gut long ol rong bilong en? Yu mas klinim mi long ol rong i stap hait.
13 Na tu Yu mas holim bek wokboi bilong Yu, long em i no ken bikhet na mekim ol sin. Yu no ken larim ol i bosim mi. Long dispela taim bai mi stap stretpela, na bai mi no bin mekim rong long dispela bikpela pasin bilong kalapim lo.
14 O BIKPELA, Yu strong bilong mi na man bilong baim bek mi, mi laik ol tok bilong maus bilong mi na ol tingting bilong bel bilong mi ol i ken i stap orait long ai bilong Yu.