¹ Wanpela Sam bilong Devit, taim em i bin ranawe long Apsalam, pikinini man bilong em.¶ BIKPELA, ol man i givim hevi long mi ol i kamap moa yet! Ol man i kirap na birua long mi ol i planti.

² Planti man i save tok olsem bilong daunim tewel bilong mi. I no gat helpim bilong em i stap long God. Sela.

³ Tasol, O BIKPELA, Yu wanpela hap plang bilong mi. Yu glori bilong mi, na Yu Man bilong litimapim het bilong mi.

⁴ ¶ Long nek bilong mi, mi bin singaut long BIKPELA. Na long liklik maunten holi bilong En, Em i bin harim mi. Sela.

⁵ Mi bin slipim bodi bilong mi na mi slip i dai. Mi bin kirap. Long wanem BIKPELA i bin lukautim mi.

⁶ Bai mi no pret long planti ten tausen manmeri husat i stap raun nabaut na redim ol yet long mekim pasin birua long mi.

⁷ O BIKPELA, Yu mas kirap. O God bilong mi, Yu mas kisim bek mi. Long wanem Yu bin paitim olgeta birua bilong mi long wasket. Yu bin brukim ol tit bilong ol man i givim baksait olgeta long God.

⁸ Wok bilong kisim bek em bilong BIKPELA. Blesing bilong Yu i stap antap long ol manmeri bilong Yu. Sela.