¹ But wite thou this thing, that in the laste daies perelouse tymes schulen neiye, and men schulen be louynge hem silf,

² coueitouse, hiy of bering, proude, blasfemeris, not obedient to fadir and modir, vnkynde,

³ cursid, with outen affeccioun, with out pees, false blameris, vncontynent, vnmylde,

⁴ with out benygnyte, traitouris, ouerthwert, bollun with proude thouytis, blynde, loueris of lustis more than of God,

⁵ hauynge the licknesse of pitee, but denyynge the vertu of it. And eschewe thou these men.

⁶ Of these thei ben that persen housis, and leden wymmen caitifs chargid with synnes, whiche ben led with dyuerse desiris, euere more lernynge,

⁷ and neuere perfitli comynge to the science of treuthe.

⁸ And as Jannes and Mambres ayenstoden Moises, so these ayenstonden treuthe, men corrupt in vndirstonding, repreuyd aboute the feith.

⁹ But ferthere thei schulen not profite, for the vnwisdom of hem schal be knowun to alle men, as hern was.

¹⁰ But thou hast getun my teching, ordinaunce, purposing, feith, long abiding, loue,

¹¹ pacience, persecuciouns, passiouns, whiche weren maad to me at Antioche, at Ycony, at Listris, what maner persecucyouns Y suffride, and the Lord hath delyuered me of alle.

¹² And alle men that wolen lyue feithfuli in Crist Jhesu, schulen suffre persecucioun.

¹³ But yuele men and disseyueris schulen encreese in to worse, errynge, and sendinge in to errour.

¹⁴ But dwelle thou in these thingis that thou hast lerud, and that ben bitakun to thee, witinge of whom thou hast lerud;

¹⁵ for thou hast knowun hooli lettris fro thi youthe, whiche moun lerne thee to heelthe, bi feith that is in Crist Jhesu.

¹⁶ For al scripture inspirid of God is profitable to teche, to repreue, to chastice, to lerne in riytwisnes, that the man of God be parfit, lerud to al good werk.