¹ Huius rei gratia, ego Paulus vinctus Christi Iesu, pro vobis Gentibus,

² si tamen audistis dispensationem gratiæ Dei, quæ data est mihi in vobis:

³ quoniam secundum revelationem notum mihi factum est sacramentum, sicut supra scripsi in brevi:

⁴ prout potestis legentes intelligere prudentiam meam in mysterio Christi:

⁵ quod aliis generationibus non est agnitum filiis hominum, sicuti nunc revelatum est sanctis Apostolis eius, et Prophetis in Spiritu,

⁶ Gentes esse coheredes, et concorporales, et comparticipes promissionis eius in Christo Iesu per Evangelium:

⁷ Cuius factus sum minister secundum donum gratiæ Dei, quæ data est mihi secundum operationem virtutis eius.

⁸ Mihi omnium sanctorum minimo data est gratia hæc, in Gentibus evangelizare investigabiles divitias Christi,

⁹ et illuminare omnes, quæ sit dispensatio sacramenti absconditi a sæculis in Deo, qui omnia creavit,

¹⁰ ut innotescat principatibus, et potestatibus in cælestibus per Ecclesiam, multiformis sapientia Dei,

¹¹ secundum præfinitionem sæculorum, quam fecit in Christo Iesu Domino nostro:

¹² In quo habemus fiduciam, et accessum in confidentia per fidem eius.

¹³ Propter quod peto ne deficiatis in tribulationibus meis pro vobis: quæ est gloria vestra.

¹⁴ Huius rei gratia flecto genua mea ad Patrem Domini nostri Iesu Christi,

¹⁵ ex quo omnis paternitas in cælis, et in terra nominatur,

¹⁶ ut det vobis secundum divitias gloriæ suæ, virtute corroborari per Spiritum eius in interiorem hominem,

¹⁷ Christum habitare per fidem in cordibus vestris: in charitate radicati, et fundati,

¹⁸ ut possitis comprehendere cum omnibus sanctis, quæ sit latitudo, et longitudo, et sublimitas, et profundum:

¹⁹ scire etiam supereminentem scientiæ charitatem Christi, ut impleamini in omnem plenitudinem Dei.

²⁰ Ei autem, qui potens est omnia facere superabundanter quam petimus, aut intelligimus, secundum virtutem, quæ operatur in nobis:

²¹ Ipsi gloria in Ecclesia, et in Christo Iesu in omnes generationes sæculi sæculorum. Amen.