¹ Павел, Апостол Иисус Христов волею Божиею, по обетованию жизни, яже о Христе Иисусе,

² Тимофею возлюбленному чаду: благодать, милость, мир от Бога Отца и Христа Иисуса Господа нашего.

³ Благодарю Бога, Емуже служу от прародителей чистою совестию, яко непрестанную имам о тебе память в молитвах моих день и нощь,

⁴ желая видети тя, поминая слезы твоя, да радости исполнюся,

⁵ воспоминание приемля о сущей в тебе нелицемерней вере, яже вселися прежде в бабу твою Лоиду и в матерь твою Евникию: известен же есмь, яко и в тебе.

⁶ Еяже ради вины воспоминаю тебе возгревати дар Божий живущий в тебе возложением руку моею:

⁷ не бо даде нам Бог духа страха, но силы и любве и целомудрия.

⁸ Не постыдися убо страстию Господа нашего Иисуса Христа, ни мною юзником Его: но спостражди благовествованию (Христову) по силе Бога,

⁹ спасшаго нас и призвавшаго званием святым, не по делом нашым, но по Своему благоволению и благодати данней нам о Христе Иисусе прежде лет вечных,

¹⁰ явльшейся же ныне просвещением Спасителя нашего Иисуса Христа, разрушившаго убо смерть и возсиявшаго жизнь и нетление благовествованием,

¹¹ в неже поставлен бых аз проповедник и Апостол и учитель языков.

¹² Еяже ради вины и сия стражду: но не стыждуся. Вем бо, Емуже веровах, и известихся, яко силен есть предание мое сохранити в день он.

¹³ Образ имей здравых словес, ихже от мене слышал еси, в вере и любви, яже о Христе Иисусе.

¹⁴ Доброе завещание соблюди Духом Святым живущим в нас.

¹⁵ Веси ли сие, яко отвратишася от мене вси, иже от Асии, от нихже есть Фигелл и Ермоген.

¹⁶ Да даст (же) милость Господь Онисифорову дому, яко многажды мя упокои и вериг моих не постыдеся,

¹⁷ но пришед в Рим, тощнее взыска мя и обрете:

¹⁸ да даст ему Господь обрести милость от Господа в день он: и елико во Ефесе послужи ми, добрее ты веси.