¹ A IET me koe en asa, ni imwi en ran akan ansau apwal pan pwaida.

² Pwe aramas akan pan kasampwaleki pein irail, o norok moni, o ponmasu, o aklapalap, o lalaue, o sota peiki ong me wia ir adar, o so danke, o me sued.

³ O sempok, o sasa mak, o likinekine, o weit, o so kadek, so pok ong me mau kan,

⁴ O me kin pangala me saraui, o me katil la, o kala, o inong iong me sued mon Kot.

⁵ Me sansalki lelapok ap sasa a manaman; muei wei sang mepukat.

⁶ Pwe akai irail kin wailong ong nan im akan o kaloedi li akai, me toutouki dip, o me inong sued kin kaua ir sili.

⁷ Me kin sukusukul ansau karos, ap sota lolekong kila melel.

⁸ A duen Ianes o Iampres palian Moses, iduen mepukat kin palian melel, i song en aramas akan me suedelar ni lol arail, o me sota mau ong poson.

⁹ A re sota pan pwaida, pwe ar lolepon pan sansal ong karos dueta a wiauier ren irail.

¹⁰ A koe ale sang ai padak o ai tiak, o ai lamalam o poson, o dadaurata, o limpok, o kanongama,

¹¹ O kamekam akan, o kalokolok kan, me lel ong ia nan Antiokien, o Ikonien, o Listra; song en kalokolok toto, me lel ong ia. A Kaun o kotin dore ia lar sang ir karos.

¹² A karos me men dadaurata duen me kon ong Kot ren Kristus Iesus, pan kamekameki.

¹³ A aramas sued o malaun akan pan kakairida ni ar sued, irail pan kotaue aramas akan o re pan kotaue irail.

¹⁴ A koe dadaurata, me koe padakkier pwe koe asaer, me koe padakki sang er.

¹⁵ O koe asa kisin likau saraui kan sang ni om seri, me kak kalolekongi uk ong maur potopot ki poson me mi ren Kristus Iesus.

¹⁶ Pwe masan en kisin likau kan karos tapi sang ren Ngen en Kot, me mau ong padak, o kapung, o kamau, o kainene ong me pung.

¹⁷ Pwe aramas en Kot en unsokela o koiok ong wiawia mau karos.