¹ Poul, the boundun of Crist Jhesu, and Timothe, brother, to Filemon, bilouyd, and oure helpere, and to Appia,

² most dere sister, and to Archip, oure euene kniyt, and to the chirche that is in thin hous,

³ grace be to you, and pees of God oure fader, and of the Lord Jhesu Crist.

⁴ I do thankingis to my God, euere more makinge mynde of thee in my preieris,

⁵ heringe thi charite and feith, that thou hast in the Lord Jhesu, and to alle hooli men,

⁶ that the comynyng of thi feith be maad opyn, in knowing of al good thing in Crist Jhesu.

⁷ And Y hadde greet ioye and coumfort in thi charite, for the entrailis of hooli men restiden bi thee, brother.

⁸ For which thing Y hauynge myche trist in Crist Jhesu, to comaunde to thee that that perteyneth to profit;

⁹ but Y biseche more for charite, sithen thou art siche as the elde Poul, and now the boundun of Jhesu Crist.

¹⁰ Y biseche thee for my sone Onesyme, whom Y in boondis bigat,

¹¹ which sumtyme was vnprofitable to thee, but now profitable bothe to thee and to me; whom Y sente ayen to thee.

¹² And resseyue thou hym as myn entrailis;

¹³ whom Y wolde withholde with me, that he schulde serue for thee to me in boondis of the gospel;

¹⁴ but with out thi counseil Y wolde not do ony thing, that thi good schulde not be as of nede, but wilful.

¹⁵ For perauenture therfor he departide fro thee for a tyme, that thou schuldist resseyue hym with outen ende;

¹⁶ now not as a seruaunt, but for a seruaunt a most dere brother, most to me; and how myche more to thee, bothe in fleisch and in the Lord?

¹⁷ Therfor if thou hast me a felowe, resseyue hym as me; for if he hath ony thing anoied thee,

¹⁸ ethir owith, arette thou this thing to me.

¹⁹ Y Poul wroot with myn hoond, Y schal yelde; that Y seie not to thee, that also thou owist to me thi silf.

²⁰ So, brothir, Y schal vse thee in the Lord; fille thou myn entrails in Crist.

²¹ Y tristnynge of thin obedience wroot to thee, witynge that thou schalt do ouer that that Y seie.

²² Also make thou redi to me an hous to dwelle in; for Y hope that bi youre preyeris Y schal be youun to you.

²³ Epafras, prisoner with me in Crist Jhesu,

²⁴ greetith thee wel, and Mark, Aristark, Demas, Lucas, myn helperis.

²⁵ The grace of oure Lord Jhesu Crist be with youre spirit. Amen.