¹ For den skuld bøygjer eg mine kne, eg, Paulus, Kristi Jesu fange for dykk heidningar -

² um de elles hev høyrt um hushaldet med den Guds nåde som eg hev fenge for dykk,

³ at han ved openberring kunngjorde meg den løyndomen so som eg ovanfor hev skrive med få ord,

⁴ so de av det, når de les det, kann sjå mitt skyn på Kristi løyndom,

⁵ som i forne tidebolkar ikkje hev vorte kunngjord for menneskjeborni, so som han no er openberra for hans heilage apostlar og profetar ved Anden:

⁶ at heidningarne er medervingar og høyrer med til likamen og hev lut med i lovnaden i Kristus Jesus ved evangeliet,

⁷ det som eg vart tenar for etter den Guds nådegåva som eg hev fenge ved verknaden av hans magt.

⁸ Eg, den aller ringaste av alle dei heilage, fekk denne nåden, å forkynna heidningarne evangeliet um Kristi uransakelege rikdom

⁹ og upplysa alle um korleis hushaldet er med den løyndomen som frå ævelege tider hev vore løynd i Gud, som hev skapt alle ting,

¹⁰ for di at Guds mangfaldige visdom no gjenom kyrkja skulde verta kunngjord for magterne og herredømi i himmelen,

¹¹ etter den fyresetning frå ævelege tider som han fullførde i Kristus Jesus, vår Herre,

¹² han som me hev fenge fritt mod ved og tilgjenge med tillit ved trui på honom.

¹³ Difor bed eg at de ikkje må tapa modet ved dei trengslor eg lid for dykk, og som er dykkar æra. -

¹⁴ For den skuld bøygjer eg mine kne for Faderen,

¹⁵ som er den rette fader for alt som heiter barn i himmelen og på jordi,

¹⁶ at han etter rikdomen av sin herlegdom må gjeva dykk å verta styrkte med kraft ved hans Ande i dykkar indre menneskje,

¹⁷ at Kristus må bu ved trui i dykkar hjarto, [Stu21: 18] so de, rotfeste og grunnfeste i kjærleik,

¹⁸ må magtast å fata med alle dei heilage, kva breidd og lengd og dypt og høgd det er,

¹⁹ og kjenna Kristi kjærleik, som gjeng yver all kunnskap, so de kann verta fyllte til all Guds fylla.

²⁰ Men honom som er megtig til å gjera yver alle ting, ovlangt yver det som me bed um eller skynar, etter den kraft som er verksam i oss,

²¹ honom vera æra i kyrkja og i Kristus Jesus gjenom alle ætter i alle ævor! Amen.