¹ Paulus, Jesu Kristi apostel ved Guds vilje, til dei heilage i Efesus som trur på Kristus Jesus:

² Nåde vere med dykk og fred frå Gud, vår Fader, og Herren Jesus Kristus!

³ Lova vere Gud og vår Herre Jesu Kristi Fader, som hev velsigna oss med all åndeleg velsigning i himmelen i Kristus,

⁴ liksom han valde oss ut i honom, fyrr verdi vart grunnlagd, at me skulde vera heilage og ulastelege for hans åsyn,

⁵ med di han i kjærleik fyreåt etla oss til barnekår hjå seg sjølv ved Jesus Kristus etter si frie vilje-rådgjerd,

⁶ til lov for sin herlege nåde, som han gav oss i honom som han elskar.

⁷ I honom hev me utløysingi ved hans blod, forlating for synderne, etter rikdomen av hans nåde,

⁸ som han gav oss rikleg i all visdom og vitsemd,

⁹ då han kunngjorde oss løyndomen um sin vilje etter si frie rådgjerd, som han fyresette seg med seg sjølv,

¹⁰ um eit hushald han vilde skipa når tiderne var fullkomne, nemleg at han atter vilde sameina alt til eitt i Kristus, både det som er i himmelen, og det som er på jordi.

¹¹ Og i honom hev me og fenge arvlut, etter at me fyreåt var etla dertil etter hans fyresetning som verkar alt etter si vilje-rådgjerd,

¹² so me skulde vera hans herlegdom til lov, me som fyreåt hadde vona på Kristus.

¹³ Og i honom hev de og, då de hadde høyrt sannings-ordet, evangeliet um dykkar frelsa - i honom hev de og, då de hadde teke ved trui, fenge til innsigle den Heilage Ande, som var oss lova,

¹⁴ han som er pantet på vår arv til hans eigedomsfolks utløysing, hans herlegdom til lov.

¹⁵ Difor, sidan eg høyrde um dykkar tru på Herren Jesus og um dykkar kjærleik til alle dei heilage,

¹⁶ so held eg ikkje upp med å takka for dykk når eg kjem dykk i hug i mine bøner,

¹⁷ at vår Herre Jesu Kristi Gud, herlegdomens Fader, må gjeva dykk visdoms og openberrings Ande til kunnskap um seg,

¹⁸ og gjeva dykkar hug upplyste augo, so de kann kjenna kva von det er han hev kalla dykk til, og kor rik på herlegdom hans arv er ibland dei heilage,

¹⁹ og kor yvervættes stor hans magt er for oss som trur, etter verknaden av hans velduge kraft,

²⁰ som han synte på Kristus, då han vekte honom upp frå dei daude og sette honom ved si høgre hand i himmelen,

²¹ høgt yver all magt og yverråd og alt velde og herredøme og yver kvart namn som vert nemnt, ikkje berre i denne verdi, men og i den tilkomande,

²² og han lagde alt under hans føter og gav honom som hovud yver alle ting åt kyrkja,

²³ som er hans likam, fyllt av honom som fyller alt i alle.