Namba Wan Pas i Kam Long Aposel

1 Jon

¹ ¶ Dispela samting i bin stap long stat, dispela mipela i bin harim, dispela mipela i bin lukim wantaim ol ai bilong mipela, dispela mipela i bin lukluk long en, na ol han bilong mipela i bin holim, bilong Tok bilong laip.

² (Long wanem, dispela laip i kamap ples klia, na mipela i bin lukim, na stap witnes, na soim long yupela dispela laip i stap gut oltaim oltaim, dispela i stap wantaim Papa, na i kamap ples klia long mipela,)

³ Dispela samting mipela i bin lukim na harim mipela i tokaut long en long yupela, inap long yupela tu ken gat pasin poroman wantaim mipela. Na tru tumas, pasin poroman bilong mipela em i wantaim Papa, na wantaim Pikinini Man bilong em Jisas Kraist.

⁴ Na ol dispela samting mipela i raitim i go long yupela, inap long amamas tru bilong yupela i ken stap pulap.

⁵ ¶ Dispela nau em dispela toksave mipela i bin harim long em, na tokaut long yupela, long God em lait, na insait long em i no gat tudak liklik.

⁶ Sapos yumi tok olsem yumi gat pasin poroman wantaim em, na wokabaut long tudak, yumi giaman, na yumi no mekim pasin tru.

⁷ Tasol sapos yumi wokabaut long lait, olsem em i stap long lait, yumi gat pasin poroman wanpela wantaim narapela, na blut bilong Jisas Kraist, Pikinini Man bilong em, i klinim yumi long olgeta sin.

⁸ ¶ Sapos yumi tok olsem yumi no gat sin, yumi giamanim yumi yet, na tok tru i no stap insait long yumi.

⁹ Sapos yumi autim ol sin bilong yumi, em i man yu inap bilip long em na stretpela long lusim ol sin bilong yumi, na long klinim yumi long olgeta pasin i no stretpela.

¹⁰ Sapos yumi tok olsem yumi no bin mekim sin, yumi mekim em kamap man bilong giaman, na tok bilong em i no stap insait long yumi.