¹ Смеет ли кто от вас, вещь имея ко иному, судитися от неправедных, а не от святых?

² Не весте ли, яко святии мирови имут судити? И аще вами суд приимет мир, недостойни есте судищем худым?

³ Не весте ли, яко аггелов судити имамы, а не точию житейских?

⁴ Житейская бо судища аще имате, уничиженных в церкви, сих посаждаете.

⁵ К сраму вам глаголю: тако ли несть в вас мудр ни един, иже может разсудити между братий своих?

⁶ Но брат с братом судится, и то пред неверными.

⁷ Уже убо отнюд вам срам есть, яко тяжбы имате между собою. Почто не паче обидими есте? Почто не паче лишени бываете?

⁸ Но вы (сами) обидите и лишаете, да еще братию.

⁹ Или не весте, яко неправедницы Царствия Божия не наследят? Не льстите себе: ни блудницы, ни идолослужителе, ни прелюбодее, (ни сквернителе,) ни малакии, ни мужеложницы,

¹⁰ ни лихоимцы, ни татие, ни пияницы, ни досадителе, ни хищницы Царствия Божия не наследят.

¹¹ И сими (убо) нецыи бесте, но омыстеся, но освятистеся, но оправдистеся именем Господа нашего Иисуса Христа и Духом Бога нашего.

¹² Вся ми леть суть, но не вся на пользу: вся ми леть суть, но не аз обладан буду от чего.

¹³ Брашна чреву, и чрево брашном: Бог же и сие и сия упразднит. Тело же не блужению, но Господеви, и Господь телу.

¹⁴ Бог же и Господа воздвиже, и нас воздвигнет силою Своею.

¹⁵ Не весте ли, яко телеса ваша удове Христовы суть? Вземь ли убо уды Христовы, сотворю уды блудничи? Да не будет.

¹⁶ Или не весте, яко прилепляяйся сквернодейце едино тело есть (с блудодейцею)? Будета бо, рече, оба в плоть едину.

¹⁷ Прилепляяйся же Господеви един дух есть (с Господем).

¹⁸ Бегайте блудодеяния: всяк (бо) грех, егоже аще сотворит человек, кроме тела есть: а блудяй во свое тело согрешает.

¹⁹ Или не весте, яко телеса ваша храм живущаго в вас Святаго Духа суть, Егоже имате от Бога, и несте свои?

²⁰ Куплени бо есте ценою. Прославите убо Бога в телесех ваших и в душах ваших, яже суть Божия.